Raġel ta’ 21 sena sofra ġrieħi ta’ natura gravi wara li waqa’ minn fuq tal-linja.
L-inċident seħħ għall-ħabta tat-8.30pm tal-bieraħ meta l-Pulizija mill-Għassa tal-Qawra ġew infurmati li kien hemm bżonn l-assistenza tagħhom fl-inħawi ta’ Kennedy Grove, San Pawl il-Baħar direzzjoni lejn Triq il-Kosta.
Il-Pulizija marru fuq il-post, fejn minn investigazzjonijiet preliminari rriżulta li r-raġel Taljan, kien sofra xi ġrieħi f’inċident b’tal-linja.
Ir-raġel ittieħed l-Isptar Mater Dei għall-kura b’ambulanza, fejn aktar tard ġie ċċertifikat li qed isofri minn ġrieħi gravi.
L-investigazzjonijiet tal-Pulizija għadhom għaddejjin.
