Il-President Taljan, Sergio Mattarella, ħeġġeġ lill-partiti politiċi biex jiffurmaw gvern ta’ koalizzjoni ‘mill-aktar fis’, fil-jiem li ġejjn, bħala l-uniku mezz biex jevitaw l-elezzjonijiet bikrija fl-Italja.
Dan meta l-Italja, li hi t-tielet l-akbar ekonomija fiz-zona ewro, tinsab għaddejja minn taqlib politiku wara r-riżenja, din il-ġimgħa, tal-Prim Ministru Giuseppe Conte.
Ir-riżenja saret fi żmien sensittiv ħafna għall-Italja fost it-tħejjijiet għall-baġit tal-2020. Il-kriżi politika kienet xprunata mill-Partit tal-Lega ta’ Matteo Salvini, il-Ministru Taljan għall-Intern, li qal li ma jistax jaħdem aktar mal-Moviment Cinque Stelle bħala sieħeb fil-koalizzjoni li qed tmexxi lill-Italja.
Intant, il-President Mattarella beda l-konsultazzjonijiet bil-għan li jitwaqqaf Gvern ġdid u meta ltaqa’ mad-delegazzjonijiet tal-Partit Demokratiku tax-Xellug (PD) u l-Moviment Cinque Stelle, kif ukoll mar-rappreżentanti ta’ gruppi politiċi oħrajn.
Il-Partit Demokratiku tax-Xellug u Cinque Stelle huma avversarji politiċi iżda diġà jinsabu f’negozjati dwar il-possibbiltà li jmexxu lill-pajjiż f’alleanza. Dawn iż-żewġ partiti jibżgħu li Salvini – magħruf għall-politika tiegħu kontra l-immigrazzjoni u l-Unjoni Ewropea — kapaċi jikseb rebħa kbira li kieku l-elezzjonijiet ġenerali kellhom isiru llum, fl-Italja
Mattarella, sadanittant, insista dwar deadline qasir għan-negozjati u biex hu jara s-sinjali ċari ta’ ftehim għal koalizzjoni ġdida. Il-President Taljan qed jittama wkoll fi żviluppi konkreti li jindirizzaw il-kriżi politika f’pajjiżu sa kmieni l-ġimgħa d-dieħla.
Intant, is-swieq tal-Italja dehru li għamlu kambjament għall-aħjar minn wara r-riżenja ta’ Conte u meta hemm tamiet ġodda li koalizzjoni ‘PD-Cinque Stelle” tevita l-elezzjonijiet bikrija fuq bażi nazzjonali.
