BIRKIRKARA…………………… 0 FLORIANA……………………. 1
Birkirkara: A. Hogg, J. Ferreira, E. Pepe, M. Vella, L. Montebello, Y. Yankam (J. Bezzina 85’), R. Briffa, C. Attard, H. Prado Caio (F. Falcone 46’), M. Alba (M. Guillaumier 78’), I. Ntow
Floriana: I. Akpan, E. Ruiz, D. Venancio, K. Keqi, J. Arias Ulises (C. Borg 89’), B. Paiber (E. Herrera 64’), J. Pisani, N. Garcia, A. Caseres (T. Fonseca 72’), A. Cini, R. Camenzuli
Imwissija: R. Briffa 9’, Y. Yankam 18’, J. Ferreira 93’ (B)
Skorja: K. Keqi 30’ (F)
Referee: Fyodor Zammit
Assistenti Referees: Duncan Sultana, Duncan Spencer
BOV Plejer tal-logħba: Kristian Keqi (Floriana)
Attendenza: 1,525
Floriana rebħu l-ewwel konfront dirett tal-istaġun meta grazzi għal daqqa ta’ ras stupenda ta’ Keqi fl-ewwel taqsima għelbu lil Birkirkara 1-0, f’logħba li minkejja li m’offriet xejn spettakolari kkonfermat il-potenzjal qawwi li għandhom dawn iż-żewġ timijiet.
Floriana ma serqu xejn għax kienu l-aħjar speċjalment fl-ewwel taqsima, iżda mingħajr dubju li Birkirkara kien ħaqqhom xi ħaġa aħjar fejn laqtu l-lasta avversarja għal tliet darbiet u anki kellhom ballun salvat minn fuq il-linja.
Iż-żewġ naħat kellhom diversi uċuħ ġodda fejn mingħajr dubju li dawn it-timijiet kienu l-iktar attivi fis-suq tat-trasferimenti. Għalkemm il-bidu kien wieħed kwiet, iż-żewġ naħat mill-ewwel urew li għandhom potenzjal kbir u li se jkunu fost il-protagonisti għar-rebħ tat-titlu.
Wara tmien minuti xutt bid-dawra ta’ Keqi bil-ballun imur ftit barra. Ir-risposta ta’ Birkirkara waslet mal-kwarta logħob b’azzjoni tajba ta’ Ntow li żmarka lil Miguel Alba li venven xutt li stampa mal-wieqfa b’Akpan kompletament megħlub.
Floriana iżda bdew iżidu fil-logħob u fid-19-il minuta, free-kick imxellef ta’ Venancio ġiegħel lil Hogg idawwar f’korner b’diffikultà. Fis-27 minuta xutt angolat ta’ Arias kien imdawwar għal korner minn Hogg u mill-istess azzjoni ta’ korner, qamet taħwida quddiem il-lasta bil-ballun finalment ikklerjat mid-difiża tal-Istripes.
Kien l-aħjar mument tal-Greens fejn Hogg wettaq save brillanti fuq xutt bomba ta’ Pisani iżda mill-korner ta’ wara ma seta’ jagħmel xejn biex salva d-daqqa ta’ ras ta’ KRISTIAN KEQI li spiċċat fix-xibka.
Birkirkara fl-aħħar minuti tat-taqsima wettqu reazzjoni tajba fejn Yankam falla minn qagħda tajba u xutt ta’ Maurizio Vella mar ftit għoli. Birkirkara resqu qrib fil-45 minuta meta minn kross ta’ Vella, Prado Caio kompletament żmarkat bir-ras ra l-ballun jgħaddi jħakkek ma’ sieq il-lasta.
Għat-tieni taqsima Birkirkara ntroduċew lil Falcone fl-attakk, iżda kien Montebello li resaq qrib b’xutt li għadda jħakkek mal-mimduda. Mas-siegħa logħob Birkirkara resqu ferm viċin meta minn kross ta’ Vella kien hemm id-daqqa ta’ ras ta’ Falcone u b’Akpan megħlub kien Ruiz li tajjar minn fuq il- -ballun jasal għand Briffa li x-xutt tiegħu ħabat mal-lasta.
Birkirkara kienu deċiżament aħjar fit-tieni taqsima iżda x-xorti ma tantx għenithom meta Falcone bi kross-shot reġa’ għal darb’oħra laqat il-mimduda. Birkirkara komplew jattakkaw iżda fl-aħħar ħinijiet naqqsu mill-intensità biex il-Greens żammew il-vantaġġ prezzjuż sat-tmiem.
