GŻIRA UNITED…………………… 0 ĦAMRUN SPARTANS…………….. 0
Gżira: J. Haber, F. Barbosa, G. Conti, N. Muscat, Z. Scerri, R. Soares, A. Cohen (S. Borg 80’), H. Kone, A. Samb, A. Oyama, J. De Assis
Ħamrun: E. Bartolo, T. Caruana, J. Ailton Soares (B. Schembri 72’), W. Domoraud, C. Failla, N. Leone, L. Soufiane, M. Criaco, K. Micallef, O. Nikolopoulos, M. Cinquini
Imwissija: G. Conti 18’ , J. De Assis 39’, F. Barbosa 85’ (G), N. Leone 27’, K. Micallef 32’, L. Soufiane 78’, M. Criaco 89’ (Ħ)
Referee: Alan Mario Sant
Assistenti Referees: Edward Spiteri, Paul Apap
BOV Plejer tal-logħba: Jefferson De Assis (Gżira United)
Gżira United kellhom jikkuntentaw bi draw kontra Ħamrun Spartans fl-ewwel logħba tal-kampjonat u dan minkejja li ddominaw għal ħinijiet twal. Filfatt Gżira kellhom ħafna pussess ta’ ballun u l-Ħamruniżi kellhom jiddefendu għal ħinijiet twal, anki jekk wieħed irid jgħid li l-Ispartans kienu ferm organizzati fid-difiża mmexxija minn Nikolopoulos, u bil-gowlkiper Bartolo jkollu prestazzjoni mill-aqwa.
L-azzjonijiet kienu kważi kollha tal-Maroons fejn fl-ewwel taqsima Haber qatt ma kien impenjat. Wara bidu kwiet, it-tim immexxi minn Tedesco beda jżid fil-logħob tiegħu u wara tmien minuti Jefferson dar tajjeb ma’ Cinquini iżda x-xutt tiegħu kien salvat minn Bartolo.
Żewġ minuti wara free-kick ta’ Kone għadda ftit għoli u fil-21 minuta first-timer tajjeb ta’ Cohen kien salvat minn Bartolo li kien ferm attent. Fit-23 minuta ħarġa xejn tajba ta’ Bartolo minn azzjoni ta’ korner, bil-ballun jasal f’saqajn Kone li iżda naqas li jsib il-lasta minn qagħda tajba.
Fit-33 minuta azzjoni ta’ Cohen fuq il-lemin u kross lejn Jefferson li daħal tajjeb iżda bir-ras xeħet ftit għoli. Fl-aħħar minuti Gżira żiedu l-isforzi tagħhom u fit-43 minuta Oyama żmarka lil Samb li xeħet ftit għoli minn qagħda tajba.
Fil-ħin miżjud tat-taqsima l-isbaħ opportunità għal Gżira meta Cohen żmarka lil Samb li kien imċaħħad minn Bartolo u mir-rebound ix-xutt ta’ Jefferson kien imtajjar minn fuq il-linja minn Cinquini.
Fit-tieni taqsima Gżira żiedu l-isforzi tagħhom u l-ewwel għoxrin minuta kienu diffiċli għall-Ispartans li rarament ħarġu mill-qoxra difensiva. Fis-56 minuta xutt imxellef ta’ Kone għadda jħakkek mal-lasta.
Fis-67 minuta azzjoni personali ta’ Amadou Samb u xutt fil-baxx ħasad lil Bartolo bil-ballun jaħbat ma’ sieq il-lasta. Ħames minuti wara daqqa ta’ ras ta’ Jefferson minn qagħda tajba bil-ballun imur barra.
Għaxar minuti mit-tmiem azzjoni oħra tajba ta’ Gżira b’Andrew Cohen jidħol tajjeb fil-kaxxa iżda x-xutt ċentrali tiegħu kien salvat minn Bartolo. L-aħħar azzjoni kienet tal-Ispartans bil-free-kick ta’ Failla jmur ftit għoli.
