Aston Villa kisbu l-ewwel rebħa tagħhom minn kemm ilhom li rritornaw fil-Premier League b’rebħa tajba ta’ 2-0 fuq Everton f’logħba li ntlagħbet f’Villa Park. Huma fetħu l-iskor fit-22 minuta meta f’attakk veloċi, kien Jota li mil-lemin qassam b’mod preċiż lejn Wesley li b’xutt mill-ewwel fil-baxx għeleb lil Jordan Pickford.
Everton laqtu l-lasta fit-82 minuta b’xutt fil-baxx ta’ Alex Iwobi li ħabat mal-wieqfa u fid-89 minuta fallew ċans tad-deheb b’Theo Walcott ifalli mill-viċin. Everton tefgħu kollox fuq l-attakk iżda kienu Aston Villa li fil-95 minuta ssiġillaw ir-rebħa f’kontrattakk li fih John McGinn qassam lejn is-sostitut Anwar El Ghazi li fuq il-ġirja avvanza u skorja b’xutt fil-baxx.
