Rapport: Keane Cutajar
TARXIEN RAINBOWS…………………. 0 MOSTA………………………. 4
Tarxien: R. Briffa, T. Veronese, D. Mambouana, B. Muscat, D. Zerafa, M. Ciantar, M. Spiteri (M. Botta 44’), A. Andrejic, S. Shaba, M. Tabone (C. Zahra 86’), M. Gomez
Mosta: A. Vella, J. Ekani (C. Grech 85’), E. Murga (L. Portelli 90+1’), W. Souza Gomes, N. Kotlov (Z. Brincat 82’), D. Xuereb, R. Morisco, K. Gatt, M. Jallow, T. Farrugia, M. Muchardi
Imwissija: D. Zerafa 39’ (T)
Skorjaw: T. Farrugia 40’, N. Kotlov 56’, E. Murga 59’, M. Jallow 80’ (M)
Referee: Darryl Agius
Assistenti Referees: Duncan Sultana, Ivan Galea
Il-Mument Plejer tal-logħba: Matias Muchardi (Mosta)
BOV Plejer tal-logħba: Edin Murga (Mosta)
L-ikbar rebħa ta’ tmiem l-ewwel ġimgħa fil-Kampjonat Premier waslet minn Mosta meta umiljaw lil Tarxien Rainbows 4-0, skor li seta’ kien akbar, però f’bosta azzjonijiet it-tim ta’ Mark Miller kien traskurat fl-aħħar terz. Iż-żewġ timijiet kellhom bosta uċuħ ġodda fil-formazzjonijiet tagħhom, b’Mosta jidru xi ftit iktar b’saħħithom milli għalqu l-istaġun li għadda speċjalment b’kuntrast ma’ Tarxien.
L-ewwel azzjoni waslet wara sitt minuti fuq in-naħa ta’ Tarxien u kien id-debuttant Andrejic Aleksa li ltaqa’ bir-ras ma’ kross mix-xellug iżda mmira ċentrali u ma ħoloq l-ebda problema għal Andreas Vella. Mosta resqu viċin fis-36 minuta meta Edin Murga daħal tajjeb fil-kaxxa u b’veloċità ġie wiċċ imb wiċċ ma’ Rudy Briffa, b’dan tal-aħħar ikun tajjeb jimblokka b’siequ dak li seta’ kien l-ewwel gowl tal-partita. Risposta mmedjata tar-Rainbows meta minn kontrattakk veloċi, Aleksa għamel spazju għalih innifsu u prova minn pożizzjoni angolata, xutt li iżda kien ċentrali u faċli għal Vella.
Mosta marru fil-vantaġġ fl-40 minuta meta kross tad-debuttant Matias Muchardi sab lill-captainTYRONE FARRUGIA li b’daqqa ta’ ras b’saħħitha tefa’ fix-xibka. L-iskor għal ftit ma sarx 2-0 u kien biss grazzi għad-debuttant Briffa bejn il-lasti li Tarxien daħlu jistrieħu wieħed biss minn taħt. Dan għaliex sekondi qabel tmiem it-taqsima l-gowlkiper salva b’mod stupend mix-xutt bomba minn barra l-kaxxa ta’ Muchardi.
Tarxien ħarġu jfittxu l-gowl fit-tieni taqsima u fis-47 minuta, Daniel Zerafa sab ruħu fil-kaxxa avversarja u prova minn qagħda ferm angolata però Vella mblokka tajjeb. Żewġ minuti wara, Mosta tilfu opportunità tad-deheb meta Jonas Ekani u Momodou Jallow naqsu li jolqtu kif riedu u minn qagħda ideali spiċċaw raw il-ballun imur barra. Fl-istess azzjoni il-Mostin talbu għal penalty f’dak li deher handsballċar iżda r-referee Darryl Agius issenjala biss goalkick favur Tarxien.
It-tim imexxi minn Mark Miller irdoppja l-vantaġġ fis-56 minuta meta NIKITA KOTLOV iltaqa’ ma kross fil-baxx ta’ Rafael Morisco u spara wara Briffa. Huma għamluhom tlieta tliet minuti wara meta EDIN MURGA ħarab fuq kontrattakk, minn nofs il-grawnd baqa’ tiela waħdu, daħal fil-kaxxa u kien preċiż biex tefa’ fix-xibka.
Jallow għamel l-impossibli u xeħet barra xutt mill-kaxxa ż-żgħira fis-70 minuta, ċans li wasal grazzi għal xogħol tajjeb ta’ Kotlov, ċans li seta’ jkompli jagħmel l-iskor wieħed diżappuntanti għal Tarxien. Biss ma tantx għadda ħin qabel ma l-iskor kompla jikber hekk kif MOMODOU JALOW kompla għal ġewwa wara l-ġirja u l-passaġġ ta’ Kotlov fit-80 minuta. Fl-aħħar sekondi free-kick b’saħħtu ta’ Rafael Morisco kien salvat tajjeb minn Briffa.
