Wara li lmenta li l-Qorti Maltija ma mxietx sew miegħu fuq post mikri lil terzi persuni anzjan irnexxielu jieħu s-sodisfazzjon mill-Qorti Ewropea tad-Drittijiet tal-Bniedem wara li din ordnat lill-Gvern Malti jagħtih kumpens ta’ €14,000.
Dan wara li r-raġel kellu post mikri lil ħaddieħor b’kera baxxa.
Victor Portanier, ta’ 88 sena mis-Swieqi, għandu appartament f’Tas-Sliema u fl-1974 daħal f’kuntratt semi-emfitewsi ma’ koppja dwaru. L-istess kuntratt kien estiż fl-1991 sakemm fl-2008 il-koppja bidlet il-kuntratt f’kera bi ħlas ta’ €1,186 fis-sena.
Dan il-fatt urta lil Portanier u lil martu li fetħu kawża fil-Qorti ta’ Malta fejn huma lmentaw mill-fatt li l-koppja kienet qed tgħix fir-residenza bi prezz baxx.
Il-Qorti Kostituzzjonali ordnat kumpens ta’ €2,500, madankollui m’ordnatx lill-koppja li kienet fil-post toħroġ mill-appartament, anke jekk il-koppja Portanier fetħu kawża oħra biex tiġi evakwata.
Portanier u martu bdew proċeduri kontra Malta wara li ħassewhom urtati bid-deċiżjonijiet tal-Qorti ta’ Malta u l-Qorti Ewropea tad-Drittijiet tal-Bniedem tathom raġun fejn fis-sentenza tagħha konkludiet li l-koppja Portanier sofrew minn vjolazzjoni ta’ Artiklu 1 u 13 tal-Protokoll Numru 1.
Għaldaqstant kien ordnat li l-Gvern Malti għandu jagħti lill-koppja, sidien tar-residenza f’Tas-Sliema, kumpens pekunjarju ta’ €8,000 u ieħor €6,000 għall-ispejjeż relatati mal-kawża.
