ĦAMRUN SPARTANS……………….. 2 GUDJA UNITED…………………. 2
Ħamrun: M. Bartolo, T. Caruana, J. Ailton Soares, W. Domoraud, C. Failla, N. Leone, L. Soufiane, M. Criaco, K. Micallef, O. Nikolopoulos, M. Cinquini (R. Darmanin 87’)
Gudja: J. Debono, Z. Cassar (J. Farrugia 74’), A. Friggieri (D. Grima 79’), R. Winchester, C. Santana Barroso, G. Mensah, A. De Barros, H. Vella, J.A. Bolanos, J. Grioli, A. Miranda (L. Cremona 61’)
Imwissi: L. Soufiane 73’ (Ħ)
Skorjaw: M. Criaco 43’, J. A. Bolanos 48’, R. Winchester 81’, R. Darmanin 88’
Referee: Malcolm Spiteri
Assistenti Referees: Paul Apap, Ivan Galea
In-Nazzjon Plejer tal-logħba: Carlos Santana (Gudja United)
BOV plejer tal-logħba: Carlos Santana (Gudja United)
Attendenza: 931
Gudja United wettqu rimonta tajba fit-tieni taqsima u mmexxija minn Santana f’forma brillanti, skorjaw darbtejn biex dawru l-iżvantaġġ li bih daħlu jistrieħu fil-mistrieħ. Huma dehru resqin lejn rebħa sorprendenti meta s-sostitut Ryan Darmanin salva lill-Ispartans b’daqqa ta’ ras fit-88 minuta. Kienet logħba pjaċevoli l-iktar fit-tieni taqsima, fejn Gudja kkonfermaw li bħaż-żewġ timijiet l-oħra promossi, se jkunu kapaċi jagħtu sfida lil kulħadd.
Bidu tajjeb tal-Ħamruniżi li wara ħames minuti resqu qrib b’xutt bomba ta’ Ailton Soares salvat b’diffikultà minn Debono. Wara dan il-bidu l-logħba saret iktar bilanċjata bit-tim Ħamruniż ikollu iktar inizjattiva iżda Gudja kienu organizzati fid-difiża u Ħamrun ftit kellhom opportunitajiet ta’ skor. Filfatt Ħamrun kellhom jirrikorru għal diversi tentattivi minn tarf il-kaxxa, fejn resqu qrib l-iktar b’xuttijiet ta’ Soares u Caruana. Fis-36 minuta ċans tad-deheb għal Gudja f’azzjoni ta’ kontrattakk bid-difiża Ħamruniża tinqabad ħażin iżda Winchester kompletament żmarkat falla l-mira.
Żewġ minuti mill-intervall Ħamrun fetħu l-iskor meta MARCO CRIACO fajjar ġmiel ta’ first-timer li ma ta l-ebda ċans lil Debono jsalva. Eżatt qabel l-intervall Mensah daħal tajjeb għal kross mix-xellug iżda d-daqqa ta’ ras tiegħu għaddiet ftit għoli.
Tliet minuti mill-ftuħ tat-tieni taqsima Gudja kisbu d-draw meta minn azzjoni ta’ korner kien JUAN BOLANOS li għola fuq kulħadd u bir-ras għeleb lil Bartolo. Minuta wara Ħamrun resqu qrib b’xutt bomba ta’ Ailton Soares iħakkek mal-mimduda. Fl-54 minuta Debono kien ferm attent biex ċaħħad lil Soares li kien ferm attiv għall-Ispartans, u ftit wara fuq in-naħa l-oħra Friggieri kellu lob tajjeb imur barra. Fit-63 minuta save tajjeb ta’ Bartolo fuq free-kick sabiħ ta’ Santana.
Ħdax-il minuta mit-tmiem Debono salva tajjeb daqqa ta’ ras mill-viċin ta’ Domoraud biex żewġ minuti wara RUNDALL WINCHESTER ħarab min nofs il-grawnd u minkejja li ssikkat għeleb lil Bartolo b’xutt fil-baxx.
Ħamrun bil-forza tad-disperazzjoni xeħtu kollox fl-attakk u x-xorti daħqitilhom fis-78 minuta meta f’azzjoni ta’ kontrattakk Santana qassam lejn Winchester li l-lob tiegħu stampa mal-mimduda. Mill-periklu meħlus Ħamrun approfittaw għaliex minuta wara salvaw il-logħba meta Ailton Soares qassam lejn RYAN DARMANIN li kien għadu kif daħal, u dan bl-ewwel ballun li mess b’daqqa ta’ ras salva l-logħba għall-Ispartans.
