Kollox jindika li s-sensiela ta’ rapporti li l-Każin Laburista ta’ Triq Ġafar f’Tas-Sliema qiegħed iservi ta’ bejta għall-abbuż tad-droga u l-logħob tal-azzard waqgħet fuq widnejn torox fir-rigward ta’ min hu responsabbli minn dan il-Każin u l-bar tiegħu u kellha tkun l-Amministrazzjoni Ċentrali tal-Partit Laburista li fiżikament tmur fil-post u tagħlqu permezz ta’ katnazz ġdid.
Jidher li uffiċjalment dan il-Każin Laburista fi Triq Ġafar f’Tas-Sliema ngħalaq bħal-lum ħmistax wara deċiżjoni mill-Amministrazzjoni Ċentrali tal-Partit Laburista u aktar tard matul dik il-ġurnata jidher li kienu membri tal-istess Amministrazzjoni Ċentrali Laburista li marru fiżikament jagħlqu l-aċċess għal dan il-Każin.
Nifhmu li r-reazzjoni ta’ persuni fit-tmexxija tal-Każin ma tantx kienet waħda pożittiva u hekk kif l-aħbar kienet komunikata wkoll lil xi persuni involuti fit-tmexxija tal-bar, qamet oġġezzjoni kbira. Kien hemm min argumenta li hu jaqla’ l-għajxien tiegħu u tal-familja minn dan il-Każin. Madanakollu jidher ukoll li lil din il-persuna kien hemm min ipprova jikkalmaha billi wiegħda impjieg bi dħul tajjeb f’xi entità governattiva.
Kien f’dan l-iżvilupp li persuna partikulari fit-tmexxija tal-bar tal-Każin Laburista ta’ Triq Ġafar f’Tas-Sliema spiċċat tiġbor il-firem għal petizzjoni bl-iskop li tagħmel pressjoni fuq l-Amministrazzjoni Ċentrali tal-Partit Laburista biex dan il-Każin partikulari jerġa’ jinfetaħ.
L-istorja tal-għeluq ta’ dan il-Każin Laburista kienet żvelata minn In-Nazzjon nhar il-Ġimgħa li għadda.
Sorsi li nhar il-Ġimgħa, wara l-iżvelar ta’ din l-istorja, tkellmu ma’ il-mument qalulna li fl-aħħar xhur f’Tas-Sliema kien hemm ħafna diskors dwar kif il-Każin Laburista ta’ Triq Ġafar kien qed jintuża għal skop ta’ abbuż tad-droga u l-logħob tal-azzard. Kien qed isir ukoll diskors fis-sens li ħadd ma kien qiegħed jagħmel xejn biex dawn l-abbużi jitwaqqfu minnufih… la min-naħa ta’ min imexxi l-Każin, la mill-Amministrazzjoni Ċentrali tal-Partit Laburista u anqas mill-Pulizija.
Imbagħad ħmistax ilu l-Amministrazzjoni Ċentrali tal-Partit Laburista għalqet dan il-Każin u sa minn dakinhar żammet skiet perfett dwar l-għeluq tal-Każin minħabba l-abbuż tad-droga u l-logħob tal-azzard.
Minn Ġunju lil hawn dan il-Każin beda jkun iffrekwentat minn numru ta’ persuni rinomati għat-traffikar tad-droga u minn oħrajn b’passat kriminali.
Sorsi li tkellmu ma’ il-mument żvelaw magħna kif oriġinarjament il-problema tal-abbuż tad-droga kienet konċentrata f’każin ieħor fl-istess lokalità. Iżda l-Kumitat ta’ dik is-Soċjetà kien iddiskuta din il-kwistjoni u kien iddeċieda li temporanjament jagħlaq il-bar.
Nifhmu li min kien qiegħed jiffrewkenta lil dan il-każin partikulari u issa spiċċa bil-bar magħluq, fittex refuġju f’post ieħor biex hekk ikompli bl-operat u n-negozju tiegħu tat-traffikar tad-droga.
Kollox jindika li l-attenzjoni ntefgħet fuq il-Każin Laburista ta’ Triq il-Ġafar f’Tas-Sliema fejn f’temp qasir bdiet tpoġġi klikka ta’ nies magħrufa għat-traffikar tad-droga kif ukoll għall-involviment tagħha fil-logħob goff tal-azzard.
In vista ta’ dan ix-xenarju l-Pulizija tad-Distrett u anki l-Pulizija tal-Iskwadra ta’ Kontra d-Droga u anki dik ta’ Kontra l-Vizzji, ma jidhirx li qatt għamlu xi rejd għall-abbużi li kienu qed isiru fl-istess Każin Laburista. Dan minkejja li dawn l-abbużi fi ftit jiem biss bdew ikunu organizzati minn persuni b’dellhom tqil jew b’passat kriminali.
Dan is-sigriet magħruf dwar dawn l-abbużi jidher li kienu konxji tiegħu mhux biss ħafna Slimiżi, imma oħrajn minn barra l-lokalità ta’ Tas-Sliema. Fil-fatt spiss fil-Każin Laburista ta’ Triq il-Ġafar kienu jirrikorru terzi persuni għal skop ta’ xiri ta’ droga u li mhumiex mill-akkwati ta’ Tas-Sliema.
Nifhmu li quddiem din is-sitwazzjoni ta’ negozju ta’ droga kif ukoll ta’ logħob goff tal-azzard, l-Amministrazzjoni Ċentrali tal-Partit Laburista flok ma rrikorriet għand il-Pulizija għal azzjoni immedjata, iddeċidiet li jingħalaq il-każin. Il-Każin Laburista ta’ Triq il-Ġafar issa ilu magħluq ċirka min-nofs Awwissu li għadda.
Is-sorsi li tkellmu ma’ il-mument qalulna wkoll li għalkemm ittieħdu dawn il-passi, jidher li din il-klikka ma nqatgħetilhiex rasha għaliex issa qed tara fejn se tintefa’ biex jissokta l-operat tagħha.
Huma temmew li kien ikun ferm aktar għaqli kieku min ħa d-deċiżjoni li jagħlaq il-bibien tal-Każin Laburista ta’ Triq il-Ġafar f’Tas-Sliema, informa lill-Pulizija biex jagħmlu rejd u jaqbdu lil min qed jittraffika t-trab abjad u lil min hu l-moħħ wara l-logħob tal-azzard.
