Il-President tal-Istati Uniti, Donald Trump, għamilha ċara li mhumiex se jkomplu t-taħditiet mal-militanti tat-Taliban bil-għan li tintemm il-gwerra ta’ 18-il sena fl-Afganistan.
‘Sakemm għandi x’naqsam jien, it-taħditiet huma lesti u konklużi’, qal Trump, wara li hu, fi tmiem il-ġimgħa, kien ħassar pjani sigrieti biex jilqa’ delegazzjoni tat-Taliban fl-Istati Uniti.
Id-deċiżjoni tal-President ittieħdet wara l-qtil ta’ suldat Amerikan mit-Taliban, b’kelliema għall-militanti Iżlamiċi jsostnu, wara, li ‘l-Istati Uniti se tispiċċa titlef l-aktar talli ħassret it-taħditiet’.
Il-President Trump kien qed jittama li jirtira lill-14,000 suldat Amerikan mill-Afganistan bħala tragward importanti tal-politika barranija tiegħu. Iżda hu, issa, qed jgħid li ‘filwaqt li l-Istati Uniti tixtieq li ġġib lil dawn is-suldati lura d-dar, dan għandu jsir fiż-żmien xieraq u opportun’.
