Wara li s-sena l-oħra ġie organizzat l-ewwel edizzjoni tal-festival MUSIC+, din is-sena l-Fondazzjoni Classique se tippreżenta t-tieni edizzjoni li se ssir bejn is-27 ta’ Settembru u l-1 ta’ Novembru 2019.
Dan se tikkonsisti minn numru ta’ recitals minn artisti lokali u internazzjonali, master classes fi strumenti differenti, workshops għal studenti tal-primarja, taħdidiet u opra mit-tfal għat-tfal.
Il-kunċerti ta’ dan il-festival jibdew fis-27 ta’ Settembru b’recital minn Anastasiya Petryshak (vjolin) u Lorenzo Meo (pjanu) mill-Ukrajna u l-Italja rispettivament. Fit-28 ta’ Settembru mbagħad, is-sopran Taljana Rossana Potenza, se tagħti kunċert flimkien mal-pjanista Leonardo Quadrini. Dik it-tmiem il-ġimgħa ttemm b’recital ieħor miċ-ċellist Ungeriż Akos Kertesz u l-pjanista Rita Kertesz fid-29 ta’ Settembru.
Fl-4 ta’ Ottubru, fis-7.30pm ġewwa ċ-Circolo Gozitano, Dr Abraham Borg se jagħti taħdita bit-titlu From Il Trovatore to La Boheme. Fit-13 ta’ Ottubru recital ieħor din id-darba minn Brendan Ball, trumpeter mal-Orkestra Filarmonika Nazzjonali, u l-pjanista Elaine Mercieca. F’dan ir-recital se ssir il-premiere dinji ta’ Deconstructed Images ta’ Alan Cassar.
Il-pjanista Maltija Joanne Camilleri se tagħti recital fid-19 ta’ Ottubru, b’oħra ssir fl-20 ta’ Ottubru mill-klarinettist ta’ fama mondjali Corrado Giuffredi u l-pjanista tiegħu Roberto Arosio. Il-pjanista żagħżugħa Għawdxija Daphne Delicata se tagħmel recital fis-27 ta ‘Ottubru. Dawn ir-recitals kollha se jsiru fis-Sala tal-Wirjiet tal-Ministeru għal Għawdex u jibdew fis-7.30pm.
L-aħħar recital f’din is-serje se ssir fl-1 ta’ Novembru fil-Knisja ta’ San Franġisk, ir-Rabat, fis-7.30pm mill-kwartett tal-korda Quartetto Mediterraneo mill-Italja. Fost xogħlijiet oħra, il-programm jinkludi xogħol bikri tal-mibki, Joseph Vella, Piccolo Divertimenti, Op.2. Il-kunċert jibda fis-7.30pm.
Għal aktar dettalji tistgħu tikkuntatjaw: musicplusgozo@gmail.com.
