SENGLEA ATHLETIC……………. 2 MOSTA…………………… 1
Senglea: A. Curmi, M. Micallef, S. Olberkis, M. Todorovic, T. Marukawa (J. Micallef 84’), G. Virano (W. Zamble 63’), D. Xuereb, S. Cipriott, A. do Nascimento Carneiro, L. Grech (J. Tanti 58’), J. Teixeira
Mosta: A. Vella, D. Xuereb, T. Farrugia, R. Morisco, D. Bonnici (K. Gatt 89’), M. Muchardi, N. Kotlov, A. Roach (Z. Brincat 81’), E. Murga, W. Gomes, M. Jallow
Imwissija: M. Todorovic 4’, A. do Nascimento Carneiro 50’, G. Virano 62 (S)
Skorjaw: N. Kotlov 18’ (M), T. Marukawa 34’, W. Zamble 69’ (S)
Referee: Slobodan Petrovic
Assistenti Referees: Paul Apap, Ivan Galea
Il-mument Plejer tal-logħba: Taisei Marukawa (Senglea Athletic)
BOV Plejer tal-logħba: Taisei Marukawa (Senglea Athletic)
Attendenza: 570
Ċertament li s-sorpriżi f’dan il-bidu tal-istaġun mhux qed jonqsu hekk kif fl-ewwel post tal-klassifika bħalissa hemm Senglea u Sirens b’seba’ punti. Senglea lbieraħ kisbu t-tieni rebħa konsekuttiva meta għelbu lil Mosta 2-1, f’logħba mill-iktar bilanċjata u li forsi kkastigat iżżejjed lill-Mostin li kien ħaqqhom xi ħaġa aħjar.
Senglea kienu superjuri fl-ewwel fażi tal-logħba iżda Mosta kienu bla dubju aħjar fit-tieni parti, fejn ironikament sofrew dak li kellu jkun il-gowl rebbieħ tat-tim mill-Kottonera. Senglea kienu xi ftit aħjar fl-ewwel taqsima fejn gawdew minn ftit supremazija territorjali u kienu huma l-iktar li fittxew il-lasta avversarja. Madanakollu Mosta ma kienux passivi, anzi dejjem kienu lesti jattakkaw fejn taħt id-direzzjoni ta’ Muchardi fil-midfield kienu dejjem ta’ theddida għad-difiża tat-tim mill-Kottonera.
Fil-fatt wara ftit minuti Todorovic irriskja sewwa meta iffawlja lil Jallow eżatt qabel dan daħal fil-kaxxa. L-istess Jallow naqas li jsib il-lasta b’daqqa ta’ ras mill-viċin wara azzjoni tajba ta’ Roach. Senglea kellhom lil Marukawa ferm attiv u flimkien ma’ Virano kienu ta’ uġigħ ta’ ras għad-difiża Mostija. Marukawa ġiegħel lil Vella jsalva b’diffikultà xutt fil-baxx minn qagħda angolata, biex fis-17-il minuta Mosta marru minn fuq.
Pass preċiż ta’ Muchardi ġab lil NIKITA KOTLOV waħdu u dan b’kalma kbira għeleb lil Curmi b’xutt fil-baxx. Senglea kellhom reazzjoni tajba u Virano impenja lil Vella direttament minn free-kick biex fl-34 minuta Senglea kisbu draw meritat. Kien TAISEI MARUKAWA li rċieva ballun mil-lemin ta’ Grech u wara li qabeż difensur skorja gowl mill-isbaħ bil-ballun fir-rokna tax-xibka.
Fit-tieni taqsima Mosta ħarġu ferm aħjar u Senglea kellhom jiddefendu hekk kif Mosta bdew jippressaw fl-attakk. Wara ħames minuti xutt bomba ta’ Morisco kien imblukkat minn Curmi u ħames minuti wara Curmi kien salvat minn Todorovic li mblokka x-xutt ta’ Gomes wara azzjoni tajba fuq ix-xellug bejn Murga u Kotlov.
Fis-66 minuta save spettakolari ta’ Curmi fuq xutt ta’ Edin Murga biex salva lil Senglea, li tliet minuti wara marru minn fuq kontra x-xejra tal-logħob. Ballun fit-tul ta’ Curmi u xi ftit ta’ indeċiżjoni bejn Morisco u l-gowlkiper Vella u daħal is-sostitut WILFRIED ZAMBLE li qabbeż il-ballun minn fuq Vella.
Għaxar minuti mit-tmiem azzjoni tajba ta’ Jan Tanti u xutt li għadda ftit għoli u fit-83 minuta ċans tad-deheb għal Mosta iżda Zachary Brincat xeħet ftit għoli minn qagħda. Ħames minuti wara Mosta għal darba oħra viċin il-gowl tad-draw meta daqqa ta’ ras ta’ Tyrone Farrugia kienet imblukkata minn fuq il-linja minn Mano Micallef.
