Cagliari kisbu t-tieni rebħa tal-kampjonat wara li f’darhom għelbu lil Genoa 3-1, bil-gowls jaslu kollha fit-tieni taqsima. Kien l-eks GIOVANNI SIMEONE li fetaħ l-iskor fl-ewwel minuta tat-tieni taqsima b’daqqa ta’ ras għar-rokna wara kross mix-xellug.
CHRISTIAN KOUAME deher li se jsalva punt għal Genoa meta ġab id-draw fit-83 minuta b’xutt b’saħħtu minn tarf il-kaxxa, iżda Cagliari skorjaw darbtejn sa tmiem il-logħba biex assiguraw ir-rebħa. Il-gowl tal-vantaġġ wasal ftit sekondi wara meta minn kross mil-lemin ta’ Nahitan Nandez, id-difensur Cristian Zapata xeħet fix-xibka tiegħu stess. JOAO PEDRO għalaq il-logħba fis-87 minuta meta avvanza nofs grawnd waħdu u għeleb lil Ionut Radu mingħajr diffikultà.
