Liverpool fetħu l-impenji fil-UEFA Champions League b’telfa iżda l-forma tagħhom fil-Premier League hi totalment differenti hekk kif għadhom b’punti massimi wara ħames logħbiet. Huma jmorru fi Stamford Bridge biex jilagħbu kontra Chelsea, tim li mhux l-ewwel darba li tellef lit-tim li jkun fil-quċċata. Chelsea għandhom motivazzjoni partikolari li jiksbu l-ewwel rebħa f’darhom minn kemm ilu li Frank Lampard beda jmexxi l-klabb.
Lampard għad irid jiddeċiedi fuq il-kundizzjoni fiżika ta’ Mason Mount, Antonio Rűdiger, N’Golo Kante u Emerson filwaqt li Reece James u Callum Hudson-Odoi għadhom mhux disponibbli. Il-manager ta’ Liverpool Jurgen Klopp se jkun mingħajr Alisson u Divock Origi filwaqt li Naby Keita rritorna għat-taħriġ. Liverpool tilfu biss darba fl-aħħar 44 logħba fil-Premier League filwaqt li ilhom bla telfa għal 22 logħba. Klopp għandu ċans li jsir l-ewwel manager li jirbaħ tliet darbiet fi Stamford Bridge fil-Premier League.
Wara li sofrew l-ewwel telfa fl-aħħar ħarġa tagħhom, Leicester qed jittamaw li jirritornaw għar-rebħ kontra Tottenham li rnexxielhom jitilgħu mal-ewwel erbgħa. Leicester huma konxji mill-potenzjal, hekk kif minn meta Brendan Rodgers ħa t-tmexxija tat-tim fil-bidu ta’ Marzu, huma biss Liverpool, Manchester City u Chelsea li kisbu aktar punti minnhom. Tottenham ġejjin minn draw fost il-ġimgħa fil-UEFA Champions League wara li tilfu vantaġġ doppju kontra Olympiacos. Il-manager tagħhom Mauricio Pochettino jaf li għandhom sensiela ta’ rebħiet konsekuttivi biex jikkalmaw l-ambjent fil-klabb wara bidu pjuttost anqas mill-altezza tagħhom.
F’din il-logħba se jispikka d-dwell Ingliż bejn l-attakkant ta’ Leicester Jamie Vardy u dak ta’ Tottenham Harry Kane. Vardy skorja fl-aħħar tliet logħbiet kontra Tottenham filwaqt li mill-istaġun 2014/15 hu skorja 31 gowls kontra s-sitta l-kbar. Fuq in-naħa l-oħra, Kane skorja 13-il gowl fi 12-il logħba fil-kompetizzjonijiet kollha kontra Leicester.
Premier League
Ilbieraħ: Southampton v Bournemouth 1-3
Illum: Leicester v Tottenham 1.30pm, Burnley v Norwich 4.00pm, Everton v Sheffield United 4.00pm, Manchester City v Watford 4.00pm, Newcastle v Brighton 6.30pm
Għada: Crystal Palace v Wolves 3.00pm, West Ham v Manchester United 3.00pm, Arsenal v Aston Villa 5.30pm, Chelsea v Liverpool 5.30pm
