Lokali

Joseph Muscat se jiltaqa’ mal-familja Caruana Galizia wara insistenza minn Adrian Delia

Il-Prim Ministru Joseph Muscat fil-jiem li ġejjin mistenni li jiltaqa’ mal-familja Caruana Galizia biex jiddiskuti magħhom l-inkjesta dwar il-qtil tas-Sinjura Caruana Galizia, u dan il-Prim Ministru se jkun qed jagħmlu wara insistenza ripetuta mill-Kap tal-Partit Nazzjonalista Adrian Delia.

Nifhmu li fis-sigħat li għaddew, l-Uffiċċju tal-Prim Ministru għamel kuntatt mal-familja Caruana Galizia biex tkun stabbilita laqgħa bejn l-istess Prim Ministru u l-familjari ta’ Daphne Caruana Galizia li nqatlet b’bomba impoġġija fil-karozza li kienet qed issuq ftit ’il bogħod mir-residenza tagħha fil-Bidnija.

Nhar il-Ġimgħa l-Gvern ħabbar uffiċjalment li kien ħatar lill-Imħallef Emeritu Michael Mallia biex imexxi u jikkoorduina Inkjesta Pubblika Indipendenti dwar dan id-delitt li kien kexkex lill-pajjiżna.

Adrian Delia fil-ġimgħat u x-xhur li għaddew ripetutament insista mal-Prim Ministru mhux biss dwar inkjesta pubblika indipendenti, imma anke biex jiltaqa’ mal-familjari tal-vittma u jiddiskuti magħhom dan id-delitt.

Segwi iktar dwar din l-istorja fil-ħarġa ta’ llum, ta’ il-mument.