Manchester United u Arsenal ħadu punt kull wieħed f’Old Trafford f’logħba li probabbilment ir-riżultat finali ma kkuntenta lil ħadd. Il-partita mhux se tibqa’ mfakkra bħala l-aktar waħda eċċitanti bejn dawn iż-żewġ rivali, iżda Manchester United kienu l-aktar tim li ħoloq azzjonijiet u probabbli huma l-aktar tim li ħareġ diżappuntat.
B’dan ir-riżultat, Arsenal telgħu fir-raba’ post bi 12-il punt daqs West Ham filwaqt li Manchester United jinsabu fl-10 post b’disa’ punti, f’dak li hu l-agħar bidu għalihom fl-era tal-Premier League.
Għalkemm kellhom ħafna pussess fl-ewwel minuti tal-logħba, Manchester United naqsu li jkunu ta’ periklu serju għal Bernd Leno, tant li l-aħjar azzjoni waslet man-nofs siegħa logħob. Kienet azzjoni personali ta’ Andreas Pereira, bix-xutt fil-baxx ikun salvat tajjeb mill-gowlkiper avversarju. Ż
Arsenal bdew iżidu l-pusess fl-aħħar kwarta u kellhom l-aħjar okkażjoni fl-44 minuta b’xutt għar-rokna ta’ Bukayo Saka jkun salvat parzjalment minn De Gea, bil-gowlkiper Spanjol idawwar f’korner it-tieni xutt ta’ Matteo Guendouzi. Iżda Manchester United daħlu jistrieħu minn fuq ftit sekondi wara meta l-midfielder Scott McTominay fetaħ l-iskor b’xutt sabiħ u b’saħħtu minn barra l-kaxxa li ħalla lil Leno jħares.
Fil-bidu tat-tieni taqsima, Manchester United ipprotestaw għal penalty wara li l-ballun deher jaħbat ma’ id Sead Kolasinac fil-kaxxa iżda r-referee Kevin Friend ħalla l-logħob għaddej.
Arsenal ġabu d-draw fit-58 minuta meta Axel Tuanzebe żbalja passaġġ fin-nofs, Saka qassam mill-ewwel lejn Pierre-Emerick Aubameyang li ħa vantaġġ mill-ispazju u qabbeż il-ballun minn ħdejn De Gea. Il-gowl oriġinarjament kien imħassar għal offside iżda wara konsultazzjoni mal-VAR il-gowl ġie ġustament konvalidat.
Ir-reazzjoni ta’ Manchester United waslet fil-65 minuta b’xutt minn barra l-kaxxa ta’ Paul Pogba li għaddiet ċentimetri barra. Ftit minuti wara r-Red Devils kellhom żewġ okkażjonijiet oħra b’xutt ta’ Harry Maguire li kien salvat tajjeb minn Leno u daqqa ta’ ras ta’ McTominay li għaddiet ftit għoli. Fl-aħħar minuti, Manchester United żiedu l-isforzi tagħhom u l-aktar li resqu viċin kien fit-92 minuta bi free-kick ta’ Marcus Rashford ikun salvat b’mod brillanti minn Bernd Leno.
