Rapport: George Cassar
HIBERNIANS …………….. 0 BIRKIRKARA………………. 1
Hibernians: M. Calleja Cremona, T. Tabone Desira (I. Iriberri 62’), G. Izquier (C. Atsina 90’), A. Agius, F. Apap, D. Vella, B. Kristensen (M. Beerman 75’), J. Mbong, J. Grech, L. Nanni, T. Groothusen
Birkirkara: A. Hogg, C. Attard, K. Zammit, E. Pepe, O. Carniello, R. Briffa, R. Fenech, M. Alba (M. Mifsud 71’), C. Prado, M. Vella, F. Falcone
Imwissija: R. Fenech 45’ (B), K. Zammit 54’ (B), B. Kristensen 67’ (H), L. Nanni 79’ (H), A. Agius 81’ (H), F. Falcone 82’ (B), M. Beerman 84’ (H)
Tkeċċa: J. Mbong 94’ (H)
Skorja: F. Falcone 37’ (B)
Referee: Alan Mario Sant
Assistenti Referees: Luke Portelli, Mario Apap
Il-mument Plejer tal-logħba: Caio Prado (Birkirkara)
BOV Plejer tal-logħba: Caio Prado (Birkirkara)
Attendenza: 1,085
Gowl ta’ Federico Falcone fl-ewwel taqsima ta l-ewwel rebħa lil Birkirkara fis-sitt logħba tal-kampjonat u issa jittamaw li permezz ta’ dawn it-tliet punti jibdew iċaqilqu l-klassifika favurihom. Il-Karkariżi rnexxielhom jagħmlu wkoll dak li m’għamlux fiż-żewġ staġuni preċedenti hekk kif fl-erba’ konfronti tal-aħħar żewġ kampjonati r-rebħa dejjem marret għall-Pawlisti.
Kien mistenni ħafna iktar minn konfront bejn dawn iż-żewġ timijiet li qatt ma laħaq xi livell għoli ta’ logħob speċjalment fit-tieni taqsima fejn il-konklużjonijiet lejn il-lasti kienu skarsi. Madankollu kompla jkun osservat progress fit-tim ta’ Birkirkara li taħt it-tmexxija ta’ Andre Paus bil-mod il-mod qed jibda jiġi f’tiegħu wara li beda l-kampjonat ferm ħażin.
Il-kowċ ta’ Hibernians Stefano Sanderra beda din il-partita bi tliet plejers biss mhux Maltin, bl-erbgħa l-oħra eliġibbli jkunu fuq il-bank tas-sostituti fosthom il-gowlkiper Marko Jovicic li tilef postu mill-formazzjoni inizjali u beda floku Matthew Calleja Cremona.
L-ewwel azzjoni perikoluża ħolquha l-Karkariżi ftit qabel l-għoxrin minuta meta kien hemm nuqqas ta’ ftehim bejn Gabriel Izquier u Matthew Calleja Cremona bil-ballun jasal għand Caio Prado li iżda ma approfittax u xxuttja għoli. F’nofs l-ewwel taqsima Andrew Hogg irnexxielu jsalva mal-art ix-xutt fil-baxx ta’ Leonardo Nanni. Il-gowl li ddetermina r-riżultat ġie skurjat fis-37 minuta meta Caio Prado ta kross perfett mil-lemin lil Federico Falcone li nqala’ tajjeb minn ma’ Andrei Agius qabel skorja b’xutt fil-baxx.
Il-Karkariżi għal ftit ma reġgħux skurjaw fl-ewwel erba’ minuti tat-tieni taqsima meta Caio Prado rnexxielu jaqbeż lill-gowlkiper Matthew Calleja Cremona iżda tfixkel banalment fil-ballun u ċ-ċans inħela. Minuta qabel skorra l-ħin regolamentari Hibernians għal ftit ma salvawx punt iżda x-xutt ta’ Thomas Groothusen kien salvat b’id waħda mill-eks Andrew Hogg.
It-tamiet li t-tim minn Raħal Ġdid jieħu xi ħaġa mill-partita sfumaw għalkollox meta Joseph Mbong tilef il-ballun ma’ Maurizio Vella u ġie ġġudikat li kkommetta fawl biex waqqaf lit-Taljan milli jkompli javvanza u għalhekk intwera l-karta l-ħamra.
