Suldat ta’ 24 sena minn Naxxar ma nstabx ħati li fera gravament mara meta kien qed jiġi akkużat li ta daqqa ta’ ponn f’wiċċha ġewwa Paceville. Il-mara, Kelsey Psaila, kienet qalet lill-Pulizija li hija kienet fil-klabb Havana, fl-1 ta’ Mejju, 2017 meta nqalgħet ġlieda bejn żewġt irġiel, wieħed minnhom, is-suldat Robert Baldacchino.
Ħuha Adian Psaila u raġel ieħor intervjenew biex jikkalmaw is-sitwazzjoni, iżda skont hi Baldacchino ħebb għal ħuha. L-Uffiċjali tas-Sigurtà ntervjenew u l-mara qalet li fil-ħin li ħatfu lil ħuha, hija qaltilhom li dan ma kellux x’jaqsam. Kien dak il-ħin skont hi li Baldacchino ta daqqa ta’ ponn filwaqt li hi ħassa ħażin u spiċċat l-isptar.
Waqt ix-xhieda rriżulta li l-inċident kien ġie rrappurtat sigħat wara li kien seħħ u li Baldacchino ma kienx identifikat mill-ewwel mill-allegata vittma. L-allegat identità tiegħu saret magħrufa biss meta raġel f’party li sar l-għada, kien tenna li ta daqqa lil waħda mara.
Is-suldat ċaħad l-involviment tiegħu fil-każ u li ta xi daqqa ta’ ponn lil Psaila u anke kien talab lill-Pulizija biex jikkonfermaw dan permezz ta’ CCTV li hemm fil-post. Madankollu l-cameras, ma kienux qed jipprodu d-dettalji kollha mixtieqa.
Fis-sentenza tiegħu, l-Maġistrat Joe Mifsud qal li ngħatat evidenza konflinġenti dwar dak li verament kien seħħ u l-Prosekuzzjoni ma ppruvatx il-każ mingħajr dubju raġonevoli.
Minkejja li seħħet ġlieda fil-Havana, l-Qorti qalet li mhijex konvinta li kien Baldacchino li ta daqqa lil Psaila u kien inklinat fil-konsiderazzjonijiet tiegħu, li dan kien każ ta’ identità żbaljata. Baldacchino ma nstabx ħati li ħebb jew offenda lil Psaila.
Huwa iżda nstab ħati li ddisturba l-ordni pubblika u ġie mwissi. Għaih deher l-Avukat Joe Giglio filwaqt li l-Prosekuzzjoni tmexxiet mill-Ispettur Nikolai Sant.
