TARXIEN R. ………………….. 1
BALZAN …………………………3
Tarxien Rainbows offrew oppożizzjoni tajba lil Balzan iżda ma kienx biżżejjed biex jevitaw is-seba’ telfa minn daqstant partiti. L-iżvolta seħħet qrib is-siegħa logħob meta l-kowċ ta’ Balzan Jacques Scerri daħħal liż-żewġ plejers inernazzjonali Paul Fenech u Alfred Effiong b’dan tal-aħħar jieħu biss ftit sekondi biex jiskorja t-tieni gowl ta’ Balzan u jibdielhom it-triq tar-rebħa.
Għal Balzan kellhom partita ferm pożittiva Uros Ljubomirac u Andrija Majdevac fir-ritorn tagħhom filwaqt li beda mal-ewwel ħdax iż-żagħżugħ Zachary Karl Grech li kellu wkoll prestazzjoni tajba fuq in-naħa tax-xellug tad-difiża li s-soltu tkun okkupata minn Steve Bezzina
Wara għoxrin minuta Matthew Tabone ġie ġġudikat li waqqa’ lil Andrija Majdevac fil-kaxxa. Ir-referì Mario Apap saffar penalty li Andrija Majdevac skurjah.
Qabel spiċċat l-ewwel taqsima Balzan ġiehom iċ-ċans li jirduppjaw meta Uros Ljubomirac fetaħ lejn Andrija Majdevac li minn quddiem Rudy Briffa xxuttja ċċentrali u l-gowlkiper Tarxiniż għalaq tajjeb.
Tarxien resqu qrib il-gowl tal-parità fil-ħamsin minuta meta l-cross-shot ta’ Marco Botta mil-lemin kważi qarraq bil-gowlkiper Sean Mintoff iżda ħabat mal-lasta.
Ir-Rainbows sabu x-xibka fit-tmien minuta tat-tieni taqsima meta minn freekick ta’ Thomas Veronese, għola tajjeb Destin Mambouana li bir-ras tefa’ fir-rokna minkejja li l-gowlkiper Sean Mintoff irnexxielu jmiss bi ftit il-ballun.
Fit-63 minuta wara kien hemm azzjoni perikoluża għal Balzan fejn Alexander Kosoric laqat il-wieqfa qabel ma’ Marco Botta qala’ l-ballun minn qrib il-linja tal-gowl.
Fil-65 minuta l-kowċ Jacques Scerri lagħab żewġ karti fl-istess ħin bid-dħul ta’ Paul Fenech u Alfred Effiong. Dan tal-aħħar kien effettiv mill-ewwel għax wara ftit sekondi rċieva mingħand Stefan Dimic, qabeż lil Brooke Farrugia u skorja b’xutt fil-baxx għar-rokna.
Għaxar minuti mit-tmiem Andrija Majdevac ġera għall-pass fit-tul ta’ Michael Johnson, evita l-ħarġa ta’ Rudy Briffa iżda ġie f’pożizzjoni angolata u falla l-mira.
Ħames minuti mit-tmiem Balzan serrħu moħħhom mit-tieni rebħa konsekuttiva bit-tielet gowl meta Andrija Majdevac kompla għal ġewwa l-kross mil-lemin ta’ Uros Ljubomirac u qata’ qalb it-Tarxiniżi li baqgħu bla punti.
