Tork ġarrab feriti gravi wara li lbieraħ ttajjar fil-Marsa. L-inċident seħħ għall-ħabta tas-6.30pm fi Triq Aldo Moro.
It-Tork għandu bejn 45 u 50 sena u ntlaqat minn Mercedes misjuqa minn raġel ta’ 36 sena minn Ħaż-Żebbuġ. L-inċident seħħ fil-karreġġjata lejn il-Belt Valletta, viċin il-pont pedonali.
Fuq il-post marru l-Pulizija u ssejħet ambulanza, li minnufih ħadet lir-raġel Tork l-isptar Mater Dei.
L-investigazzjonijiet dwar dan l-inċident għadhom għaddejjin.
