Rapport: Rowen Camilleri
HIBERNIANS………. 1
ĦAMRUN S…………. 2
Hibernians: M. Jovicic, A. Agius, T. T. Desira, F. Apap, L. Barbosa, J. Grech (J. Degabriele 79’), T. Groothusen (I. Iriberri 72’), B. Kristensen (C. Astina 62’), D. Vella, G. Artiles, L. Nanni
Ħamrun: E. Bartolo, T. Caruana, J. Soares, W. Domoraud, C. Failla, N. Leone, M. Cinquini, S. Lagzir, M. Criaco, K. Micallef, O. Nikolopoulos
Imwissija: B. Kristensen 41’, L. Barbosa 51’, F. Apap 85’, D. Vella (Hi) C. Failla 63’, K. Micallef 68’ N. Leone 78’ M. Bartolo 90’ (Ħa)
Skorjaw: C. Failla 22’, S. Lagzir 30’ (Ħa), D. Vella 46’ (Hi)
Referee: Emanuel Grech
Assistenti Referees: Roberto Vella, James Muscat
In-Nazzjon Plejer tal-logħba: Soufiane Lagzir (Ħamrun Spartans)
BOV Plejer tal-logħba: Soufiane Lagzir (Ħamrun Spartans)
Attendenza: 682
F’partita movimentata speċjalment fl-ewwel taqsima, Ħamrun Spartans ħarġu rebbieħa bl-iskor ta’ 2-1 fuq Hibernians biex għalhekk l-Ispartans irritornaw għar-rebħ filwaqt li Hibernians sofrew it-tieni telfa konsekkutiva. Ħamrun kienu l-aktar tim perikoluż fejn bi ftit aktar fortuna setgħu anke skorjaw aktar.
Il-kowċ ta’ Hibernians Stefano Sanderra għamel żewġ bidliet mill-aħħar partita kontra Birkirkara fejn irritorna mis-sospensjoni Marko Jovicic minflok Matthew Calleja Cremona filwaqt li l-Brażiljan Leandro Barbosa beda l-partita mill-bidu fl-assenza ta’ Joseph Mbong li kien qed jiskonta sospensjoni ta’ logħba minħabba li tkeċċa fl-aħħar partita. Għal Hibernians irritorna wkoll l-attakkant Jurgen Degabriele li kien ilu nieqes sa minn Frar minħabba injury. Fuq in-naħa l-oħra żewġ bidliet ukoll fil-ħdax inizjali tal-Ispartans fejn minflok Valdo Alinho u Alessio Capitelli, bdew il-partita Jorge Soares u Marco Criaco.
L-ewwel azzjoni waslet minn Ħamrun Spartans fit-13-il minuta meta minn azzjoni personali Wilfried Domoraud ittanta xortih minn barra, iżda x-xutt fjakk tiegħu ġie salvat faċilment minn Jovicic. Tliet minuti wara Hibernians marru viċin meta l- kross mil-lemin ta’ Nanni, sab lil Kristensen li prova bir-ras iżda Nikolopoulos tefa’ f’korner.
Fit-22 minuta Ħamrun fetħu l-iskor meta l-korner ta’ Criaco ġie klirjat u x-xutt ta’ CLAYTON FAILLA ma ta l-ebda ċans lil Jovicic. Għaddew biss tmien minuti sakemm l-iskwadra mmexxija minn Manuele Blasi rduppjaw meta minn azzjoni personali JORGE SOARES avvanza u b’xutt minn barra l-kaxxa li ħabat ukoll mal-wieqfa, għeleb għal kollox lil Jovicic.
Fil-35 minuta ċans għal Hibernians meta Groothusen ittanta xortih minn barra l-kaxxa u Manuel Bartolo wettaq save mill-isbaħ u dawwar f’korner. Meta kollox deher li l-ewwel taqsima kienet se tispiċċa 2-0, Hibernians naqqsu d-distakk fil-ħin miżjud meta DUNSTAN VELLA għeleb lil Bartolo minn tarf il-kaxxa wara li bidel il-ballun ma’ Grech għal 2-1.
L-ewwel azzjoni perikoluża tat-tieni taqsima wasslet fil-61 minuta minn Ħamrun meta Lagzir irċieva pass u minn tliet kwarti tal-grawnd prova x-xutt li għadda mħakkek mal-lasta. Fid-69 minuta ħarba ta’ Izquier fuq ix-xellug fejn tefa’ kross insidjuż għall-aħħar iżda ħadd ma rnexxielu jilħaq fil-ħin. Żewġ minuti wara l-istess Izquier reġa tefa’ kross tajjeb li Bartolo laqa’ proviżorjament, il-ballun waqa’ għand Nanni li x-xutt tiegħu għadda ftit għoli.
Il-partita kienet nieqsa minn azzjonijiet perikolużi għal xi ħinijiet u fit-80 minuta Dunstan Vella tefa’ kross tajjeb li sab lil Vella li d-daqqa ta’ ras tiegħu ġiet salvata minn Bartolo. Fl-84 minuta Hibernians marru viċin il-gowl ta’ draw wara li Tabone Desira qassam mal-linja lis-sostitut Iriberri li x-xutt tiegħu stampa mal-wieqfa u mar barra. Minuta wara Lagzir reġa ttanta xortih min barra l-kaxxa iżda t-tentattiv tiegħu għadda ftit barra. Fid-90 minuta Lagzir reġa’ prova min barra l-kaxxa iżda għal darba oħra l-ballun għadda ftit barra.
