GUDJA U. …………………… 0
VALLETTA …………………. 1
Gowl wara 21 minuta ta’ Mario Fontanella ta tliet punti importanti lil Valletta. Il-Beltin kienu ġejjin minn draw u telfa u għalhekk kien imperattiv għalihom li jiksbu r-rebħa.
Iżda dawn it-tliet punti waslu mingħajr ma impressjonaw hekk kif batew biex jiddettaw il-logħba speċjalment fit-tieni taqsima. Gudja baqgħu jissieltu sal-aħħar biex isalvaw tal-anqas punt u saħansitra Valletta kellhom jiddefendu l-vantaġġ fl-aħħar ħinijiet.
Xejn anqas minn erba’ bidliet għal Darren Abdilla mit-telfa kontra Gżira United. Daħlu fid-difiża Ryan Camilleri u Joseph Zerafa flok Jonathan Caruana u Jean Borg. Irakli Dzaria rritorna f’nofs il-grawnd filwaqt li Kevin Tulimieri reġa’ rebaħ post mal-ewwel ħdax.
Fuq in-naħa l-oħra, Josef Mansueto għamel żewġ bidliet fit-tim li kien megħlub minn Balzan. Carlos Santana u Miguel Jimenez bdew flok Dylan Grima u Gabriel Mensah.
Valletta ħolqu l-ewwel tentattiv wara seba’ minuti meta minn ballun fit-tul, ix-xutt fuq il-ġirja ta’ Mario Fontanella kien imdawwar f’korner bi bravura minn Timothy Aquilina.
Kif mistenni, Valletta kellhom il-pussess fil-bidu tal-logħba, b’Gudja joperaw bil-kontrattakk. Fontanella reġa’ prova mal-kwarta logħob iżda ma laqatx tajjeb mill-kross ta’ Enmy Pena Beltre.
Żewġ minuti wara, Valletta kienu sfortunati li ma marrux fil-vantaġġ, b’Fontanella jqassam lura lejn Pena Beltre li b’xutt mill-isbaħ ra x-xutt jaħbat mal-mimduda u jinżel fuq il-linja. Ftit sekondi wara, Fontanella kellu xutt fil-baxx salvat parzjalment.
L-isforzi ta’ MARIO FONTANELLA ġew premjati fil-21 minuta meta rċieva mingħand Douglas Packer, qabeż plejer u minn qagħda ideali skorja b’xutt fil-baxx.
Gudja kellhom okkażjoni tajba għad-draw tliet minuti wara. Rundell Winchester b’xi mod żamm il-kontroll tal-ballun u xxuttja b’saħħtu iżda Henry Bonello salva t-tentattiv. Ftit sekondi wara, Bojan Kaljevic falla ċans tad-deheb meta naqas li jikkonkludi mir-rebound wara li xutt ta’ Tulimieri kien salvat parzjalment.
It-tim ta’ Josef Mansueto falla okkażjoni oħra importanti fil-31 minuta, b’Miguel Jimenez jixħet inkredibbilment barra mill-viċin f’azzjoni li seta’ faċilment skorja. Fl-aħħar kwarta, Gudja kienu aktar aggressivi fil-logħob tagħhom u bdew iwaqqfu lil Valletta aktar ‘l bogħod mil-lasta tagħhom, b’kawża li l-Beltin ma ħolqux aktar perikli.
Gudja komplew it-tieni taqsima kif spiċċaw l-ewwel waħda u fil-50 minuta minn kross ta’ Winchester, Carlos Santana xeħet għoli mill-viċin. Valletta kellhom ċans li jirkuppjaw tliet minuti wara bi kross ta’ Joseph Zerafa jsib lil Bojan Kaljevic iżda wara li l-ewwel daqqa ta’ ras kienet dgħajfa, it-tieni daqqa ta’ ras ħabtet mal-wieqfa.
Mas-siegħa logħob, il-gowlkiper sostitut Yenz Cini kien providenzjali meta salva fuq xutt mill-qrib ta’ Allan Miranda. Gudja appellaw għal penalty fil-71 minuta għal kuntatt bejn Ryan Camilleri u Manuel Jimenez iżda r-referee Darryl Agius ħalla l-logħob għaddej.
Għalkemm tefgħu aktar pressjoni fuq Valletta, Gudja ma ħolqux xuttijiet diretti lejn Cini, b’Fontanella jkollu żewġ okkażjonijiet fl-aħħar kwarta. L-ewwel kien fit-80 minuta meta b’xutt impenja lil Aquilina li salva tajjeb, biex fit-92 minuta t-Taljan ra x-xutt jgħaddi għoli.
