Wara diversi jiem ta’ osservazzjoni, l-Iskwadra ta’ kontra d-Droga rnexxielha tkisser ċirku ieħor ta’ traffikar ta’ droga hekk kif it-Tlieta ġie mwaqqaf ġuvni ta’ 22 sena, residenti Ħal Tarxien.
Wara tfittxija ġewwa l-vettura li kien qiegħed isuq u ġo garaxx fix-Xgħajra (Malta), li huwa taħt il-kontroll tal-istess ġuvni, instabu diversi pakketti tal-plastik li kien fihom madwar disa’ (9) kilogrammi ta’ ħaxixa tal-Cannabis lesta għat-traffikar. Tfajla ta’ 23 sena minn Bormla, qed tinżamm mil-Pulizija sabiex tgħin fl-investigazzjonijiet.
Il-Maġistrat tal-Għassa Doreen Clarke ġiet infurmata bis-sejba u ħatret diversi esperti sabiex jassistuha fl-inkjesta.
Għada, il-ġuvni mistenni jitressaq l-Qorti b’arrest quddiem il-Maġistrat Audrey Demicoli akkużat fost oħrajn bil-pussess mhux għall-użu personali tal-Pjanta kannabis, kollha jew parti minnha.
Mhux eskluż li t-tfajla titressaq ukoll b’akkużi simili.
