Penalty kważi vvintat mir-referee tal-logħba ċaħħad lil Roma mir-rebħa kontra l-leaders tal-Bundesliga Borussia Monchengladbach.
Roma dehru resqin lejn ir-rebħa grazzi għall-gowl ta’ Zaniolo fir-32 minuta.
Iżda fil-95 minuta meta r-rebħa kienet f’idejn Roma, l-ballun ħabat ma’ wiċċ Smalling iżda r-referee Skoċċiż Collum inkredibilment ordna penalty, li minnu Borussia salvaw punt.
It-tim l-ieħor ta’ Ruma Lazio lbieraħ ukoll kien impenjat f’logħba importanti kontra Celtic fi Glasgow.
Lazio kellhom prestazzjoni tajba u anki marru minn fuq grazzi għal gowl ta’ Lazzari ftit qabel il-mistrieħ.
Iżda fit-tieni taqsima Celtic dawwru l-iskor favur tagħhom bil-gowl rebbieħ ta’ Celtic jasal fl-aħħar battuti tal-logħba.
Xorti aħjar kellhom il-klabbs Ingliżi li kollha ħarġu rebbieħa. Manchester Unites kisbu r-rebħa li riedu kontra Partizan.
Il-gowl rebbieħ tar-Red Devils kien skorjat minn Martial, minn penalty ħames minuti qabel l-intervall.
Wolves ukoll rebħu barra minn darhom kontra Slovan Bratislava 2-1.
Slovan fetħu l-iskor kmieni fil-logħba grazzi għal goal ta’ Sporar, Iżda fit-tieni taqsima Wolves skorjaw darbtejn, bil-gowl rebbieħ jasal minn penalty skorjat minn Jimenez fl-64 minuta.
Tliet minuti mit-tmiem Wolves spiċċaw ukoll bi plejer inqas wara li tkeċċa Jota għat-tieni karta safra.
Arsenal kisbu rebħa drammatika kontra Vitoria Guimareas, bil-gowl rebbieħ jasal fit-93 minuta.
Vitoria fetħu tajjeb u marru fuq b’gowl ta’ Edwards wara 9 minuti u ftit wara Martinelli kiseb id-draw għall-Gunners.
Duarte reġa’ skorja għal Vitoria fil-bidu tat-tieni taqsima, iżda l-Gunners qatt ma qatgħu qalbhom u lejn it-tmiem kien l-akkwist il-ġdid Pepe li skorja doppjetta, bil-gowl tar-rebħa jasal fit-93 minuta.
Tispikka wkoll l-ikbar rebħa tal-ġurnata, dik ta’ Alkmaar li rebħu 6-0 kontra Astana.
