Wara r-rebħa kbira fost il-ġimgħa, Tottenham se jfittxu li jikkonfermaw il-potenzjal b’eżami diffiċli kontra l-leaders Liverpool f’Anfield. Id-distakk bejn iż-żewġ timijiet hu ta’ 13-il punt wara biss disa’ logħbiet, bil-futur tal-manager ta’ Tottenham Mauricio Pochettino jkun suġġett għal spekulazzjoni.
Liverpool ilhom minn Settembru tas-sena l-oħra ma jkunu megħluba f’darhom u wara tmien rebħiet konsekuttivi fil-kampjonat, il-ġimgħa l-oħra waqqgħu l-ewwel punti tagħhom wara tmien rebħiet konsekuttivi, bi draw ta’ 1-1 kontra Manchester f’Old Trafford. Huma rkupraw mill-ewwel b’rebħa ta’ 4-1 barra minn darhom kontra Genk fil-UEFA Champions League.
Dan se jkun l-ewwel bejn iż-żewġ timijiet mill-finali tal-UEFA Champions League, b’Tottenham għandhom l-opportunità perfetta biex iwettqu vendetta sportiva u fl-istess ħin jagħtuhom l-ewwel telfa fil-kampjonat. Iżda minbarra l-forma ta’ Liverpool, it-tim immexxi minn Jurgen Klopp rebaħ l-aħħar tliet konfronti kontra Tottenham.
Trent Alexander-Arnold u Joel Matip għandhom ikunu lura fit-tim wara li tilfu l-logħba kontra Genk fost il-ġimgħa. Fuq in-naħa l-oħra, Pochettino jista’ juża aktar lill-akkwist il-ġdid Giovani Lo Celso li kiseb xi minuti t-Tlieta li għadda kontra Red Star Belgrade.
Arsenal se jfittxu li jirritornaw għar-rebħ fil-Premier League meta fl-Emirates Stadium jilqgħu lil Crystal Palace f’wieħed mill-ħafna derbies ta’ Londra. Il-Gunners tilfu 1-0 kontra Sheffield United it-Tnejn li għadda u l-Ħamis kellhom bżonn żewġ gowls lejn it-tmiem biex rebħu kontra Vitoria Guimaraes fl-Europa League.
Crystal Palace ġejjin minn telfa ta’ 2-0 kontra Manchester City iżda ma jnaqqas xejn mill-bidu pożittiv li kellhom. Fil-preżent huma jinsabu biss punt taħt Arsenal u se jittamaw li jagħmlu dak li għamlu s-sena l-oħra meta rebħu u taw daqqa ta’ ħarta lil Arsenal fl-aspirazzjonijiet li jissieltu għal post mal-ewwel erbgħa.
Unai Emery jista’ jagħżel li jinkludi lil Hector Bellerin, Kieran Tierney u Rob Holding wara li lagħbu fl-Europa League. F’nofs il-grawnd mistennija jibdew Granit Xhaka, Matteo Guendouzi u Dani Ceballos, b’Alexandre Lacazette mistenni jirritorna.
Premier League
Il-Ġimgħa: Southampton v Leicester 0-9
Illum: Manchester City v Aston Villa 1.30pm, Brighton v Everton 4.00pm, Watford v Bournemouth 4.00pm, West Ham v Sheffield United 4.00pm, Burnley v Chelsea 6.30pm
Għada: Newcastle v Wolves 3.00pm, Arsenal v Crystal Palace 5.30pm, Liverpool v Tottenham 5.30pm, Norwich v Man United 5.30pm
