Malta issa naqxet isimha anke fix-xena tal-kaktus hekk kif Malti rnexxielu jkabbar tip ta’ kaktus rari f’kisba importanti li wasslet biex din tingħata l-isem ta’ Pilosocereus zahrae.
Avventura li damet is-snin biex wasslet għar-riżultati mixtieqa. Filfatt, minn mindu nstabet iż-żerriegħa ta’ din l-ispeċi, ħadet disa’ snin biex kibret sakemm ipproduċiet il-fjuri u 11-il sena biex din l-istess speċi kienet rikonoxxuta bħala speċi ġdida.
Rene Zahra qatta’ s-snin ikabbar din iż-żerriegħa li nstabet minn siehbu Pierre Braun fil-Brażil u b’paċenzja sħiħa stenna b’qalbu qawwija li tinbet.
Meta kibret u għamlet il-fjuri, kien konfermat li din l-ispeċi kienet mingħajr isem xjentifiku.
Net News iltaqa’ mal-President tas-Soċjetà Maltija tal-Kaktus u Sukkulenti Oħra, Mario Azzopardi fejn spjegalna iktar dwar il-vjaġġ ta’ Rene.
Mario Azzopardi jispjega li għas-Soċjetà tagħhom dan hu unur tant din hi okkażjoni rari.
Is-Soċjetà twaqqfet fl-1951 u tgħodd madwar 100 membru. Din toffri laqgħat edukattivi fuq il-kaktus u s-sukkulenti.
Ritratti: Matthew Tabone
