Fi tmiem il-ġimgħa li għaddiet f’Caen fi Franza, iż-żagħżugħ Malti Jurgen Balzan għamel id-debutt mat-tim il-ġdid tiegħu Stembert fiċ-Champions League. Għal Balzan din se tkun it-tieni esperjenza tiegħu ma’ tim barrani wara li fil-passat kellu esperjenza mat-tim Taljan Black and Blue Pisa.
Is-Sibt intlagħbu l-fażi tal-gruppi, b’Jurgen Balzan jikseb rebħa ta’ 5-1 kontra l-plejer ta’ TSG Rain Andreas Jung kif ukoll kontra l-plejer ta’ FTC Caen Raphael Pommier bl-iskor ta’ 1-0. Balzan irnexxielu jikseb draw ta’ 2-2 ma’ Andreas Ciccarelli li jilgħab mat-tim Taljan Napoli Fighter iżda sofra telfa ta’ 6-1 kontra Saverio Bari ta’ Reggio Emilia.
Stembert għaddew mill-fażi tal-grupp bit-tielet post, iżda sfortunatament il-Ħadd kienu eliminati mal-aħħar 16 kontra Rochefort TS, b’Stembert jikklassifikaw fit-12-il post.
