Gowl mill-isbaħ ta’ Suso direttament minn freekick fit-tieni taqsima ta rebħa mportanti lil Milan, l-ewwel waħda tagħhom taħt it-tmexxija ta’ Pioli li ħa post Giampaolo ftit tal-ġimgħat ilu.
Ir-rebħa tagħti ftit tan-nifs lr-Rossoneri u tgħollihom ‘l fuq fil-klassifika, fejn kienu ferm qrib iż-żona tar-relegation.
Iżda apparti r-rebħa li kienet waħda meritata, l-problemi ta’ Milan ma solvewx ruħhom u f’mumenti kien evidenti li Milan jinsabu f’diffikulta.
Milan ftit kellhom azzjonijiet tajba fl-ewwel taqsima, għajr għal lasta li laqat Castillejo.
Fit-tieni taqsima Milan kienu aħjar u d-dħul ta’ Calabria u speċjalment ta’ Suso ħallew il-frott mixtieq.
Fil-fatt kien propju l-Ispanjol li ddeċieda l-logħba meta skorja ġmiel ta’ gowl direttament minn freekick.
Wara l-gowl tal-vantaġġ Milan lagħbu aħjar u fallew xi ċansijiet ta’ skor, speċjalment permezz ta’ Paqueta’ li minn żewġ passi bogħod ra x-xutt tiegħu mblukkat.
Fl-aħħar ħinijiet Spal xeħtu kollox fl-attakk iżda ftit li xejn kienu perikolużi biex Milan kisbu l-ewwel rebħa taħt Pioli.
Riżultat
Milan v SPAL 1-0
