Walter Mazzarri jinsab taħt pressjoni wara l-bidu inċert ta’ Torino u llum jilqgħu lir-rivali Juventus f’dak li hu msejjaħ id-Derby della Mole. Torino kisbu żewġ punti biss f’ħames logħbiet, bil-President tal-klabb Urbano Cairo jkollu jitkellem biex jikkonferma lil Mazzarri. Juventus jinsabu fil-quċċata tal-klassifika għalkemm il-prestazzjonijiet mhux qed ikunu mill-aqwa.
Huma ġejjin minn draw kontra Lecce u rebħa f’darhom kontra Genoa, bil-gowl rebbieħ jasal fl-aħħar sekondi minn penalty ta’ Ronaldo. It-tim ta’ Maurizio Sarri naqas li ma jsofrix gowl f’ħames logħbiet uffiċjali u għalhekk Torino jittamaw li jieħdu vantaġġ mis-sitwazzjoni. Aktar minn hekk, Torino rebħu d-derby darba biss fl-aħħar 26 logħba, b’sitt rebħiet u 19-il telfa. Din is-serje tinkludi disa’ telfiet mill-aħħar għaxra u saħansitra ma skorjawx f’seba’ minnhom.
Konfront ieħor interessanti se jkun dak fi Stadio Olimpico bejn Roma u Napoli. Iż-żewġ timijiet ġejjin minn riżultati differenti, b’Roma rebħu 4-0 barra minn darhom kontra Udinese filwaqt li Napoli kienu miżmuma fi draw ta’ 2-2 kontra Atalanta. Iż-żewġ timijiet mistennija jagħmlu xi bidliet fil-formazzjoni inizjali. Carlo Ancelotti, li se jkun sospiż għal dan il-konfront, se jkollu lura lil Kostas Manolas kontra l-eks tim tiegħu, Piotr Zielinski mistenni jibda flok Allan li weġġa’ fost il-ġimgħa, filwaqt li Dries Mertens mistenni jerġa’ jibda mill-bidu.
Il-Ħamis li għadda, Milan kisbu l-ewwel rebħa taħt it-tmexxija ta’ Stefano Pioli u jittamaw li jaqbdu r-ritmu meta f’darhom jilqgħu lil Lazio. Pioli mistenni jilgħab lil Rafael Leao, Suso u Lucas Biglia wara li ma bdewx kontra Spal. Lazio qegħdin aktar fil-forma hekk kif mhux megħluba fl-aħħar ħames logħbiet, bit-tim ta’ Simone Inzaghi jinsab fil-ħames post. L-attenzjoni għalihom żgur li se ddur fuq Ciro Immobile li jinsab fil-forma. L-attakkant Taljan hu l-aqwa skorer tal-kampjonat bi 12-il gowl.
Serie A
Illum: Roma v Napoli 3.00pm, Bologna v Inter 6.00pm, Torino v Juventus 8.45pm
Għada: Atalanta v Cagliari 12.30pm, Genoa v Udinese 3.00pm, Lecce v Sassuolo 3.00pm, Verona v Brescia 3.00pm, Fiorentina v Parma 6.00pm, Milan v Lazio 8.45pm
It-Tnejn: Spal v Sampdoria 8.45pm
