Rapport: Rowen Camilleri
BIRKIRKARA………………2
GUDJA UNITED…………. 3
Birkirkara: A. Hogg, E. Pepe, M. Vella (K. Zammit 89’), R. Briffa, F. Falcone, C. Attard, C. Prado, O. Carniello, M. Alba (M. Mifsud 59’), R. Fenech, I. Ntow
Gudja U: J. Debono, J. Bondin (A. Miranda 28’) (L.Cremona 36’), Z. Cassar, M. Attard, A. Friggieri (J. Grioli 77’), R. Winchester, G. Mensah, A. De Barros, M. Jimenez, H. Vella, J. Bolanos
Imwissija: C. Prado 30’, E. Pepe 40’, I. Ntow 51’ (B), H. Vella 48’, A. De Barros 50’, J. Debono 84’ (G)
Tkeċċa: E. Pepe 71’ (B)
Skorjaw: G. Mensah 28’, 62’, R. Winchester 72’ pen (G), F. Falcone 41’, 78’ (B)
Referee: Philip Farrugia
Assistenti Referees: Roberto Vella u Thomas Debono
In-Nazzjon Plejer tal-logħba: Rundell Winchester (Gudja United)
BOV Plejer tal-logħba: Gabriel Mensah (Gudja United)
Attendenza: 438
F’dik li kienet l-aħħar partita mid-disa’ ġurnata tal-Kampjonat Premier, Gudja United kisbu l-ewwel rebħa minn disa’ partiti meta għelbu lil Birkirkara 3-2, b’dawn tal-aħħar ikomplu jiddiżappuntaw biex b’ hekk baqgħu fil-11-il post b’seba’ punti. Il-partita kienet waħda movimentata ħafna biż-żewġ naħat jaqsmu l-logħob fejn wieħed jista’ jgħid li din kienet waħda mill-isbaħ partita s’issa dan l-istaġun.
Birkirkara kellhom sospiż lil Matthew Guillaumier li tkeċċa fid-draw kontra Ħamrun Spartans u minfloku Andreas Paus beda lil Miguel Alba. Il-kowċ ta’ Gudja United Josef Mansueto kellu erba’ bidliet mit-telfa ta’ 6-1 kontra Gżira United fejn minflok Justin Grioli, Allan Miranda, Llywelyn Cremona u Carlos Santana bdew il-partita Zachary Cassar, Gabriel Mensah, Rundell Winchester u Miguel Attard.
L-ewwel azzjoni waslet wara 22 minuta logħob għal Birkirkara meta kross mil-lemin ta’ Alba, bid-difiża ta’ Gudja tonqos milli teħles il-periklu, il-ballun waqa’ f’saqajn Ntow li minn qagħda tajba xeħet għoli. Erba’ minuti wara ċans ieħor tajjeb għall-Istripes meta Falcone qassam lil Alba, b’dan tal-aħħar javvanza u prova xutt tajjeb li Debono kellu jdawwar f’korner.
Kontra x-xejra tal-logħob żewġ minuti wara Gudja fetħu l-iskor meta Winchester ħarab ħarba kważi mill-kaxxa ta’ Gudja stess, baqa’ tiela’ tul il-pitch kollu u tefa’ kross fil-baxx li sab lil Mensah li wara li l-ewwel tentattiv tiegħu ġie milqugħ minn Hogg, il-ballun reġa’ jaqa’ f’saqajn l-istess GABRIEL MENSAH li t-tieni darba ma falliex biex tefa’ lil Gudja fil-vantaġġ. Birkirkara għamlu l-iskor indaqs fil-41 minuta meta Miguel Alba tefa’ kross insidjuż li sab lil FEDERICO FALCONE li għola tajjeb bir-ras u għeleb għal kollox lil Debono għal 1-1.
Gudja United marru viċin darbtejn li jerġgħu imorru fil-vantaġġ meta fl-ewwel okkażjoni Aidan Friġġieri qabad ballun min tarf il-kaxxa l-kbira u prova xutt ċentrali, b’Hogg jidher megħlub iżda l-ballun ħabat mal-mimduda u mar barra. Ftit wara l-istess Friġġieri tefa’ kross mix-xellug lejn Winchester li d-daqqa ta’ ras tiegħu ħabtet mal-wieqfa.
L-ewwel azzjoni tat-tieni taqsima waslet minn Birkirkara fl-54 minuta meta minn free-kick ta’ Roderick Briffa, Pepe jipprova bir-ras iżda l-ballun jispiċċa f’idejn Debono. Tnejn u sittin minuta logħob u t-tim immexxi minn Josef Mansueto reġa’ mar fil-vantaġġ b’gowl mill-isbaħ ta’ GABRIEL MENSAH li xxuttja minn tliet kwarti tal-grawnd u ħalla lil Hogg iħares, bil-ballun jispiċċa fl-angolu għat-tieni gowl personali tal-plejer mill-Ghana.
Il-partita kompliet tiġi għat-telgħa għal Birkirkara meta fil-71 minuta huma spiċċaw bi plejer anqas wara li Pepe waqqa’ fil-kaxxa lil Winchester b’Philip Farrugia jordna penalty u juri t-tieni karta safra lit-Taljan. Mill-11-il metru l-istess RUNDELL WINCHESTER ma falliex biex Gudja marru żewġ gowls vantaġġ.
Birkirkara rnexxielhom inaqqsu d-distakk fit-78 minuta meta FEDERICO FALCONE rċieva ballun mix-xellug u b’xutt bid-dawra tefa’ l-ballun fix-xibka. Fid-90 minuta, hekk kif Birkirkara tefgħu kollox fuq l-attakk, Jimenez ta’ Gudja ħarab b’kontrattakk, irnexxielu jidħol fil-kaxxa iżda l-konklużjoni tiegħu kienet fjakka u spiċċat barra.
