Sampdoria kisbu t-tieni rebħa tal-kampjonat li biha nqalgħu mill-qiegħ tal-klassifika. Huma rebħu lil Spal 1-0 barra minn darhom b’gowl lejn it-tmiem tas-sostitut Gianluca Caprari. Spal kienu l-aktar tim li kellu okkażjonijiet iżda ma sabux il-gowl biex kienu sorpriżi lejn it-tmiem, f’dik li hi l-ewwel rebħa ta’ Claudio Ranieri minn kemm ilu li ħa t-tmexxija ta’ Sampdoria.
B’hekk Sampdoria kisbu l-punti fl-aħħar ħinijiet għat-tieni logħba konsekuttiva wara li evitaw telfa fost il-ġimgħa li għaddiet kontra Lecce. B’din ir-rebħa, Sampdoria tefgħu kemm lil Spal kif ukoll lil Brescia fl-aħħar post.
Il-gowl li ddeċieda l-logħba wasal fil-91 minuta meta minn kross mil-lemin, Gaston Ramirez għola tajjeb u b’daqqa ta’ ras spiċċa biex serva lil Caprari li kienu ilu jilgħab madwar minuta, biż-żagħżugħ Taljan jiskorja b’daqqa ta’ ras.
