42 ħanut biss minn total ta’ 334 fuq ix-Xatt tal-Gżira u tas-Sliema huma fiżikament aċċessibbli. Dan joħroġ minn rapport maħruġ mill-Kummissjoni għad-Drittijiet ta’ Persuni b’Diżabilita’ (CRPD).
Stqarrija tas-CRPD tgħid li minn 334 ħanut, 292 m’humiex konformi mal-Linji Gwida tad-Disinn tal-Aċċess għal Kulħadd tal-2011 maħruġa mill-Kummissjoni. Minn dawn kollha, 15-il ħanut joffru alternattiva filwaqt li 18 oħra kienu bix-xogħolijiet għaddejjin meta saru l-ispezzjonijiet.
Min-naħa l-oħra 187 ħanut jeħtieġu biss li tiġi installata rampa temporanja biex ikunu aċċessibbli. 55 ħanut ieħor jeħtieġu l-implimentazzjoni ta’ xogħolijiet minuri bħal alterazzjoni fil-bieb prinċipali filwaqt li oħrajn jeħtieġu xogħolijiet iktar sostanzjali bħal ‘lift’ tal-passiġġieri.
Sitwazzjoni simili fil-Belt Valletta
Dan ir-rapport isegwi rapport simili li sar is-sena li għaddiet fil-Belt Valletta. Spezzjonijiet imwettqa fi Triq ir-Repubblika u Triq il-Merkanti urew li minn 375 ħanut, 31 ħanut biss huma konformi mal-linji gwida filwaqt li 344 ma’ kinux.
Minn dawn, 278 ħanut jeħtieġu biss rampa temporanja, 32 jeħtieġu xogħolijiet minuri u 9 jeħtieġu xogħolijiet ikbar.
Il-Kummissarju tas-CRPD Oliver Mallia qal li “Persuni b’diżabilita’ huma konsumaturi, employers u impjegati, dawk in-negozji li jagħżlu li jibqgħu mhux aċċessibbli qed jitilfu sezzjoni tal-klijenteli potenzjali tagħhom.
B’kollox hawn 19,261 persuni b’diżabilita’ reġistrati mal-Kummissjoni għad-Drittijiet tal-Persuni b’Diżabilita’, 14,827 minn dawn għandhom diżabilita’ fiżika.
