Il-Pulizija f’Hong Kong, it-territorju li jgawdi livell ta’ awtonomija miċ-Ċina, wissew li s-sistema tal-liġi lokalizzata, illum, spiċċat ‘fix-xifer ta’ kroll totali’ wara ħames xhur ta’ protesti.
Fl-aħħar ġimgħat żdiedu l-protesti tad-dimostranti li jridu garanziji akbar għad-demokrazija f’Hong Kong u biex il-pulizija lokali ‘iwieġbu’ għall-vjolenza li użaw man-nies tat-territorju waqt l-aħħar dimostrazzjonijiet.
Il-vjolenza issa eskalat, b’dimostrant jispiċċa midrub minn tiri li sparalu pulizija u b’raġel, sostenitur taċ-Ċina, jingħata n-nar mid-dimostranti ta’ kontra l-Gvern.
Komplew, intant, il-konfronti vjolenti bejn pulizija u dimostranti fid-distrett kummerċjali ewlieni u fl-universitajiet ta’ Hong Kong. Dan waqt li mijiet ta’ dimostranti mgħammdin, mill-ġdid, garaw il-ġebel u oġġetti oħra lejn il-pulizija, li min-naħa tagħhom sparaw il-gass tad-dmugħ biex jisfurzaw il-folol lura.
Madankollu, kien hemm anki eluf ta’ ħaddiema tal-uffiċini li organizzaw protesti paċifiċi fit-toroq fost l-għajjat ta’ slogans ‘favur il-libertà u s-sostenn ta’ Hong Kong’.
