Il-klabb tal-Kampjonat Premier Senglea Athletic se jkun qed jiftaħ in-nursery tiegħu bl-għan li fil-futur il-klabb jibda jtella’ plejers żgħażagħ tiegħu li jilagħbu mat-tim ewlieni.
Għal Senglea dan hu t-tielet staġun fl-ogħla diviżjoni u issa jħossu li wasal iż-żmien li jkabbru l-klabb tagħhom. Hu fatt magħruf li fil-preżent hemm nuqqas ta’ tfal fil-Kottonera u għal xi żmien kien sar esperiment meta ngħaqdu n-nurseries tal-Kottonera flimkien, pjan li madankollu dam għal ftit snin.
Il-klabb mill-Isla jħoss li issa wasal iż-żmien biex jieħu dan il-pass u jkomplu t-titjib li sar fl-aħħar snin. Is-Sibt li ġej 16 ta’ Novembru, se ssir Open Day bejn l-10.00am u nofsinhar fil-grawnd Corradino C f’Kordin.
In-nursery se tkun taħt it-tmexxija tad-Direttur Tekniku Mario Muscat u l-Head Coach Davor Filipovic. Il-plejers barranin ta’ Senglea se jkunu wkoll qed jassistu s-sessjonijiet ta’ taħriġ flimkien ma’ kollaborazzjoni ma’ FC International Leipzig. Id-dħul għal subien u bniet hu b’xejn.
