Joseph Mary Ebejer ta’ 54 sena minn Ħal Qormi ġie kundannat sentejn ħabs sospiżi għal erba’ snin wara li ammetta li tefa’ video fuq Youtube joffendi lill-Maġistrat Joe Mifsud. Il-video twill 11-il minuta sar minn Ebejer wara li ma kienx kuntent fuq deċiżjoni mogħtija mill-istess Maġistrat.
Ebejer li tressaq quddiem il-Maġistrat Josette Demicoli ammetta li nġurja u hedded lill-Maġistrat Joe Mifsud fuq il-qadi ta’ dmirijietu u dan taħt sezzjoni 93 tal-Kodiċi Kriminali.
Ebejer li skuża ruħu għal dak li għamel fejn huwa jidher qed jindirizza lill-Maġistrat fejn għamel diversi allegazzjonijiet malafamanti fuq il-karattru tal-Maġistrat u l-familja tiegħu.
L-Avukat tal-Għajnuna Legali Noel Bartolo li kellu jidher għal Ebejer qal fil-Qorti li jista’ jkollu kunflitt ta’ nteress minħabba li huwa r-rappreżentant legali fl-amministrazzjoni tal-Qorti u l-kawżi tal-istess Qorti. Sadanittant l-Ispettur liu ressaq lil Ebejer, Roderick Agius qal fil-Qorti, li l-Avukat tal-akkużat Ludvig Caruana, ma jridx jidher aktar għalih.
Il-Qorti għamlet minn kollox biex jinġieb avukat biex ikun jista’ jiddeffendi lil Ebejer u qalet li kien se jiġi kkuntattjat l-avukat tal-għajnuna legali li jmissu fuq ir-roster. Minkejja dan kollu dan l-avukat ma setax jattendi, bit-tielet wieħed ma jkunx jista’ jsir kuntatt miegħu.
Finalment l-Avukat Benjamin Valenzia kien eventwalment appuntat mill-Qorti biex jidher għall-akkużat minflok l-indispost Marc Sant. Ebejer huwa magħruf fuq il-midja soċjali bħala Josmar Ebejer, u spiss itella’ filmati b’kummentarji fuq persuni pubbliċi.
Il-Prosekuzzjoni għaddiet kopja tal-video offensiv lill-Qorti fejn l-akkużat ingħata wkoll ingħata tazza ilma biz-zokkor minħabba li kellu livell baxx ta’ zokkor fid-demm. L-Ispettur Roderick Agius qal fil-Qorti li Ebejer tefa’ video jismu “To Joe Mifsud.” “Jien għamilt kuntatt mal-Maġistrat Mifsud u li dan qallu li l-video kienu nsulenti, u talab lill-Pulizija biex tipproċedi,” kompla jgħid l-Ispettur.
Kompla jgħid li wara nħareġ mandat ta’ arrest u Ebejer ġie arrestat fid-dar tiegħu. L-Avukati Alfred Abela u Lennox Vella, li kienu qegħdin jidhru bħala parte civile għall-Magistrat Mifsud aċċettaw l-iskuża ta’ Ebejer u qalu li l-Maġistrat ma kienx qed jinsisti li dan jingħata sentenza ta’ ħabs, iżda talbu biex il-videos kollha li jagħmlu xi referenza għall-Maġistrat Mifsud jitneħħew.
Mal-iskuża tiegħu, Ebejer qal – li l-marda li għandu xi drabi twasslu biex jitlef il-kontroll. “Kull ma rrid ġid u affarijiet tajba għalih,” huwa qal ftit wara li talab skuża.
Minbarra sentenza ta’ sentejn ħabs sospiżi għal erba’ snin il-Maġistrat Demicoli mmultat lil Ebejer €700 u ordni ta’ ħarsien favur il-Maġistrat l-familja tiegħu ġiet fis-seħħ. Il-Qorti ordnat ukoll li sal-5pm minn wara li Ebejer tressaq il-Qorti, jrid ineħħi kull video li Ebejer tefa’ u li fih jissemma il-Maġistrat Mifsud. Il-Qorti spjegat lir-raġel li jkun hemm konsegwenzi serji jekk il-video ma jitneħħiex.
