Il-Prim Ministru Iżraeljan, Benjamin Netanyahu, baqa’ jaħlef li jżomm il-poter, sigħat wara li hu spiċċa akkużat dwar tixħim, frodi u ksur ta’ fiduċja b’konnessjoni ma’ tliet każi separati. Dan meta Netanyahu qed jikkundanna l-akkużi inkwistjoni bħala ‘kolp ta’ stat kontra tiegħu’.
Netanyahu, skont l-allegazzjonijiet, kien aċċetta rigali mingħand in-negozjanti sinjuri, meta qed ikun ukoll allegat li hu qassam il-favuri bil-għan li l-istampa Iżraeljana toħroġ artikli aktar favorevoli dwar u t-tmexxija tiegħu.
Intant, Benjamin Netanyahu, waqt diskors, sostna li ‘mhux se jippermetti li l-gideb fil-konfront tiegħu jwassal għal dak li jixtiequ l-avversarji’. Fl-istess ħin, hu insista li se jkompli jmexxi lil Iżrael skont il-kriterji tal-liġi, fejn akkuża lill-ġudikatura, il-pulizija u oħrajn ‘talli ssieħbu f’kumplott kontra tiegħu li jibbaża fuq l-allegazzjonijiet b’motivazzjoni politika’.
Benjamin Netanyahu qed jgħid ukoll li ‘l-investigaturi wara dan il-proċess manipulat ma kenux qegħdin ifittxu l-verità iżda riedu jsostnu attakk fuqu personalment’. Hu anki akkuża lill-investigaturi li huma kienu qed iwettqu l-pressjoni fuq ix-xhieda biex jigdbu kontra tiegħu.
Aktar qabel, l-Avukat Ġenerali Iżraeljan, Avichai Mandelblit, qal li d-deċiżjoni dwar Netanyahu turi li ħadd mhu ’l hinn mil-liġi f’Iżrael. Hu spjega li ‘l-infurzar tal-liġi mhix kwistjoni ta’ għażla jew politika iżda konferma ta’ dak li hu sewwa u dak li mhux’.
Iżrael, fil-preżent, jinsab f’salib it-toroq – minn lat politiku – wara l-elezzjonijiet ġenerali inkonklussivi li saru f’April u Settembru. F’nofs il-ġimgħa, Benny Gantz, ir-rivali kbir ta’ Netanyahu għar-rwol ta’ Prim Ministru, qal li ma kienx kapaċi jifforma koalizzjoni b’maġġoranza fil-Parlament. Gantz kien ingħata l-opportunità biex jifforma Gvern ġdid wara li Netanyahu kien falla f’dan it-tentattiv.
Min-naħa tiegħu, il-President ta’ Iżrael, Reuven Rivlin, talab lid-deputati biex jaqblu dwar kandidat għall-kariga ta’ Prim Ministru fi żmien 21 jum, bil-għan li l-pajjiż jevita tielet elezzjoni (bħala xi ħaġa mingħajr preċedent) fi żmien sena.
//= $special ?>