Lokali

Xena oħra ta’ persuna rieqda barra

Ritratt li bgħatulna l-qarrejja tagħna juri xena li sfortunatment kull ma jmur qed issir komuni fil-Floriana, din id-darba għall-kenn quddiem wieħed mill-bibien tal-Knisja Arċipretali ta’ San Publju.

Nies li tkellmu magħna qalulna li jaraw anki din ix-xena fil-Ġnien tal-Biskuttin u anki Ġnien il-Mall fil-Floriana, anki fit-temperaturi kiesħa ta’ bil-lejl.

Din ix-xena tkompli tikkonferma statistika tal-Eurostat fejn uriet li f’pajjiżna hawn madwar 90,000 persuna li qegħdin fil-faqar jew jinsabu f’riskju ta’ faqar.

Fl-aħħar xhur statistika tal-NSO qalet ukoll li 78,685 persuna jinsabu f’riskju ta’ faqar, rata ta’ 16.8% tal-popolazzjoni li tinsab f’riskju ta’ faqar.

Dan biex wieħed ma jsemmix ukoll l-113,238 persuna li jinsabu f’riskju ta’ faqar meta tinkludi benefiċċji bħal pensjoni.

Jidher li l-Pulizija tad-Distrett u dawk tal-RIU huma konxji b’din il-problema, iżda mhux ilaħħqu mad-domanda kbira li qed ikun hemm.

Diversi Supretendenti qed jitolbu aktar riżorsi u aktar kuntistabbli sabiex ikunu jistgħu jindirizzaw l-isfidi soċjali ġodda, inkluż dawk ta’ persuni reqdin barra fit-triq, bil-problema ta’ nuqqas ta’ pulizija tinħass fl-inħawi tal-Floriana, bl-għassa tal-pulizija tkun anki ta’ spiss magħluqa.

Fil-ġimgħat u x-xhur li għaddew, NET News irraporta wkoll diversi stejjer reali ta’ nies li mhux biss qed jgħixu f’riskju ta’ faqar, iżda li saħansitra spiċċaw jgħixu fil-faqar u xi kultant saħansitra mingħajr saqaf fuq rashom.

Ikkummenta