Qabel Yorgen Fenech gie arrestat, Keith Schembri għamel nofs siegħa jitkellem miegħu. Lejliet li Fenech kien ser jitlaq minn Malta biex skont hu “isewwi d-dgħajsa”, Keith Schembri qallu “jidhirlek li ha tagħmel sew kif qed jiżvilluppaw l-affarijiet?” Sa dakinhar isem Yorgen Fenech ma kienx ħareġ imkien.
Dan meta fil-Qorti ħareġ ċar li Keith Schembri kien jaf sew fejn waslet l-investigazzjoni – kien hu illi kellem lill-Pulizija biex jagħtu go-ahead biex jiġu l-FBI u jinvestigaw l-assassinju ta’ Caruana Galizia; kien hu illi kien jitkellem direttament b’Whatsapp mal-Ispettur Arnaud.
Keith Schembri kkonferma wkoll li hu ħabib ta’ Yorgen Fenech. Kienu jsiefru flimkien. Kienu jitkellmu b’Whatsapp. U saħansitra kien imur fuq il-jott ta’ Yorgen Fenech.
Dan kollu ħareġ mill-Qorti hekk kif illum kompliet il-Kawża Kostituzzjonali li fetaħ l-imprenditur Yorgen Fenech fil-konfront tal-Ispettur Keith Arnaud.
Schembri xehed illi waqt tfittxijiet li saru f’Kastilja u fil-villa tiegħu ġew elevati xi karti u apparat elettroniku. Qal ukoll li ma kellu l-ebda rwol fis-Servizzi Sigrieti.
Fil-Qorti, Schembri insista li qatt ma qal xejn lil Yorgen Fenech.
Fit-testimonjanza tiegħu, l-eks Chief of Staff ta’ Muscat ikkonferma l-laqgħa li kellu f’Kastilja ma’ dak li hu kkunsidrat bħala l-middleman fl-assassinju – Melvin Theuma. U spjega kif Theuma kien talbu job.
“10% tal-persuni li jiġu Kastilja għal job kont nieħu ħsiebhom jien”, qal Schembri. U hawn semma’ kif ma’ Melvin Theuma ħa kafe’ u ritratt.
Ir-Rapport Egrant li ppubblika b’mod sħiħ il-Kap tal-PN Adrian Delia lbieraħ diġa’ jidher li se jkun kruċjali f’dan il-proċess, bl-avukati ta’ Fenech jistaqsu lil Schembri għaliex ħassu imweġġa’ bil-kitba ta’ Caruana Galizia. L-avukat Marion Camilleri kienet qed tirreferi propju għal dak li ħareġ mill-Inkjesta tal-kumpanija sigrieta Egrant.
Dwar Keith Arnaud, Schembri qal li ma kienx jafu qabel – sempliċiment kien ikollhom dak li sejjaħ ‘small talk’ fuq futbol. “Qatt ma kilna l-kirxa flimkien”, sostna Keith Schembri.
Hu jgħid li ma kellux x’jaqsam mal-job li ingħatat il-mara ta’ Keith Arnaud.
Għal domanda diretta, Keith Schembri jgħid li ma kellux x’jaqsam mal-attentat ta’ ħarba ta’ Yorgen Fenech bil-jott. Jinsisti li ma kienx jaf li l-mobile ta’ Fenech kien qed jiġi ittepjat.
Dalgħodu kompliet il-Kawża Kostituzzjonali li fetaħ Yorgen Fenech fil-konfront tal-Ispettur Keith Arnaud. Fenech qed ikun akkużat b’kompliċita’ fl-assassinju tal-ġurnalista Daphne Caruana Galizia.
Fis-seduta tal-lum qed jixhed l-eks Chief of Staff Keith Schembri, li wasal il-Qorti għall-ħabta tal-10:30am.
//= $special ?>