Devis Mangia tħabbar bħala l-Head Coach il-ġdid tat-timijiet nazzjonali b’kuntratt sal-31 ta’ Diċembru tal-2023. Mangia li kiseb il-liċenzja UEFA Pro miċ-Ċentru Tekniku Taljan f’Coverciano, se jibda l-irwol il-ġdid b’effett immedjat.
Fl-ewwel kummenti li għadda, il-President tal-MFA Bjorn Vassallo wera l-kuntentizza li Mangia aċċetta li jsir il-kowċ tat-timijiet nazzjonali biex ikun responsabbli għall-filosofija tal-logħob li taqbel mal-istrateġija tal-assoċjazzjoni.
“Id-diskussjonijiet ma’ Devis kompliet issaħħaħ il-konvinzjoni tagħha li hu l-għażla t-tajba biex imexxi lit-tim nazzjonali u jmexxi rivoluzzjoni teknika li se nkunu qed nagħmlu fix-xhur li ġejjin. Il-viżjoni u l-filosofija tal-futbol jagħmlu mal-pjanijiet tagħna biex intejbu l-prestazzjoni u r-riżultati tat-timijiet nazzjonali tagħha, fosthom il-proġett biex indaħħlu klabb professjonali fil-Lega Pro Taljana,” kompla Vassallo.
Fl-ewwel reazzjoni tiegħu, Mangia qal li hu kuntent li laħaq ftehim mal-MFA. “Il-proġett li ġie ppreżentat lili hu veru ambizzjuż u ninsab kunfidenti li b’ħidma iebsa u b’dedikazzjoni flimkien, nistgħu intejbu b’mod sinifikanti l-livell tal-futbol Malti.
Mangia hu kowċ Taljan ta’ 45 sena, b’esperjenza ta’ 15-il sena bħala kowċ. Fost l-esperjenzi li kellu, Mangia mexxa lil Palermo fis-Serie A fl-istaġun 2011/2012. Hu kien ukoll kowċ nazzjonali Taljan ta’ taħt il-21 sena kif ukoll, kowċ ta’ Spezia, Bari u Ascoli.
Fl-aħħar żewġ staġuni, Mangia kien kowċ ta’ Universitatea Craiova u magħhom rebaħ it-Tazza Rumena. Fiż-żewġ staġuni li mexxa l-klabb, Mangia mexxa lit-tim fit-tielet rawnd tal-UEFA Europa League, b’logħbiet kontra Milan u Leipzig.
