Total ta’ 1,400 immigrant li qed jitolbu l-ażil f’Malta qed jinżammu illegalment fiċ-Ċentri ta’ Marsa u Ħal Safi. Uħud minnhom ilhom miżmuma għal ħames xhur.
Skond rappreżentant tal-UNHCR Malta, li kkundanna s-sitwazzjoni f’Malta, l-introduzzjoni reċenti ta’ detenzjoni ta’ persuni li jfittxu l-protezzjoni ġiet deskritta bħala l-akbar daqqa li ħadu ċertu immigranti kemm ilhom f’pajjiżna.
F’intervista ma’ The Times of Malta, Kahin Ismail, li hu wkoll immigrant, stqarr kif dak li qed iseħħ f’Malta huwa l-kontra tal-liġi.
Dan joħroġ b’mod speċifiku ħafna fil-liġi Maltija, fil-liġi Ewropea, kif ukoll fil-liġi internazzjonali tar-refuġjati, fejn jingħad li d-detenzjoni għandha tintuża biss bħala l-aħħar rimedju, għal perjodu qasir ta’ żmien u din tkun dejjem ġustifikata.
Ismail jirrimarka kif wara sena li kien ilu f’pajjiżna, huwa beda jara li dawn il-liġijiet ma bdewx jiġu obduti u li l-immigranti reġgħu bdew jinżammu ġewwa ċ-ċentru miftuħ ta’ Ħal Safi.
Sal-2015, Malta kienet għamlet progress qawwi fis-settur tal-migrazzjoni, iżda s-sitwazzjoni reġgħet lura għal li kienet hekk kif il-Gvern reġa’ introduċa d-detenzjoni awtomatika li hija kienet tneħħiet gradwalment.
Fid-dawl ta’ dan jappella biex il-Gvern jieħu azzjoni immedjata dwar din il-kwistjoni.
L-UNHCR diġa kienet osservat li l-kundizzjonijiet f’dawn iċ-ċentri ta’ detenzjoni, speċjalment f’Ħal Safi huma fqar ħafna u l-minorenni mhux akkumpanjati kienu miżmuma illegalment flimkien ma’ adulti.
Fl-istess waqt ir-rappreżentant tal-UNHCR jinnota li pajjiżna kellu numru bla preċedent ta’ wasliet tal-immigranti matul din is-sena, madwar 3,400, b’konsegwenza li tefgħu pressjoni fuq is-sistemà.
Il-kundizzjonijiet f’dawn iċ-ċentri u l-iffullar fihom wasslu biex ripetutament, fix-xhur tas-Sajf, l-immigranti wettqu numru ta’ dimostrazzjonijiet għal-libertà f’Ħal Safi.Skond il-gazzetta Times of Malta, uħud li ġew arrestati b’rabta mad-dimostrazzjonijiet wkoll sofrew abbuż kemm verbali kif ukoll fiżiku mill-gwardjani tas-sigurtà.
