Irriżenja l-Gvern tal-Prim Ministru Dmitry Medvedev, b’dan ikun ikkonfermat sigħat wara li l-President tar-Russja, Vladimir Putin, tkellem fil-Parlament fejn ħabbar il-pjani biex tinbidel il-Kostituzzjoni ta’ pajjiżu.
Intant, Putin – skont l-aħħar rapporti — talab lil Medvedev biex jaċċetta l-kariga ta’ Viċi-Kap tal-Kunsill tas-Sigurtà Nazzjonali tar-Russja. Dan waqt li Medvedev innifsu qal li l-proposti tal-President għandhom jibdlu l-bilanċ tal-poter fir-Russja b’mod u manjiera sinifikanti.
Fil-fatt, l-indikazzjonijiet huma li l-bidliet fil-Kostituzzjoni huma intenzjonati biex Putin jibqa’ għaddej bil-poter għal aktar fit-tul milli hu permess bħalissa.
L-ewwel aħbar minn Moska kienet li ‘f’dan il-kuntest, il-Gvern tar-Russja qiegħed jirriżenja fil-forma attwali’. L-aħbar kienet waħda sorprendenti u l-President Putin, fi stqarrija, irringrazzja lill-amministrazzjoni li għadha kemm spiċċat ‘għal dak kollu li hi rnexxielha tikseb’.
Vladimir Putin mistenni jtemm ir-raba’ mandat ta’ poter fl-2024 u, kif inhuma l-affarijiet fil-preżent, mhux intitolat għal mandat ieħor taħt it-termini attwali tal-Kostituzzjoni.
Meta kellem lill-aġenzija tal-aħbarijiet Tass, Dmitry Medvedev (eks President tar-Russja bejn il-2008 u l-2012) qal li l-bidliet kostituzzjonali proposti minn Vladimir Putin għandhom jintroduċu ‘taqlib sostanzjali’ mhux biss għal diversi artikli tal-Kostituzzjoni iżda anki ‘fil-bilanċ sħiħ tal-poter, il-poter tal-eżekuttiv, il-poter tal-leġislatura u s-saħħa tal-ġudikatura’.
Sadanittant, il-korrispondenti f’Moska qablu li ma kenitx ċara ‘il-vera raġuni’ għalfejn Putin għażel li jneħħi lil Medvedev minn Prim Ministru.
