Mara minn Ħal Qormi ġiet ikkundannata sentejn ħabs sospiżi għal erba’ snin wara li nstabet ħatja li feriet lil ġara tagħha b’mus wara argument li seħħ fuq raġel. Il-każ seħħ kważi sitt snin ilu fejn minbarra s-sentenza sospiża l-mara kellha l-liċenzja tas-sewqan tagħha sospiża għall-perjodu ta’ tliet xhur.
Ramona Magri ta’ 36 sena nstabet ħatja li fis-6 ta’ Awwissu, tal-2014 għall-ħabta tad-9.30pm fi Triq San Bastjan, f’Ħal Qormi kkaġunat ferita gravi u oħrajn ħfief fuq Wendy Gauci. Ħareġ li huma kienu ħbieb iżda kien hemm biss problema bejn Gauci u oħta Magri, għaliex din kellha relazzjoni mar-raġel tagħha.
Il-Maġistrat Audrey Demicoli semgħet il-provi f’dan il-każ fejn Magri qalet li fil-ġurnata tal-inċident, hija pparkjat fejn cafeteria fejn kien hemm binha riekeb fis-seat ta’ wara.
F’mument minnhom, qalet li Gauci attakkata b’kanna, fejn spiċċat biex kissritilha l-ħġieġa ta’ wara, fejn binha kienet qiegħed. Hija rriversjat il-karozza u laqtet il-bankina, u wara marret l-Għassa tal-Pulizija biex tagħmel rapport.
Madankollu Gauci xehdet ukoll li l-argument kien beda ġimgħa qabel, meta l-ġara tagħha – Magri, marret tħabbat il-bieb tagħha fis-sagħtejn ta’ filgħodu, fejn din kienet qed tisuspetta li r-raġel ta’ oħtha kien ġewwa. Gauci iżda ma fetħitx il-bieb.
Ġurnata wara Guaci bdiet tirċievi numru ta’ telefonati bi kliem abbużiv minn naħa t’oħt Magri u minn Magri stess. Wara din it-telefonata Wendy Gauci ma marritx lejn l-appartament tagħha għal ġimgħa għax bdiet tibża’ u għamlet rapport bil-Pulizija jgħidulha biex ma tersaqx lejn l-appartament tagħha. Aktar tard kienet marret mal-Pulizija biex tieħu xi affarijiet personali tagħha.
L-għada hija kienet qed issuq f’Ħal-Qormi u rat lill-akkużata barra cafeteria. Magri għajtitilha sabiex tieqaf u hija waqfet. Skont l-allegata vittma, l-imputata daħlet tiġi fil-karozza tagħha, fejn Magri ħarġet mus u aggredita fejn laqtitlha f’idejha, hekk kif hija bdiet tipproteġi sidirha.
Hija mbagħat ippruvat tgħaddi minn fuqha bil-karozza, fejn anke laqtitilha l-karozza. Ħareġ li waqt li l-vittma kienet sejra l-Għassa, Ramona Magri fetħitilha l-bieba tal-karozza u ħaditilha ċ-ċwievet. Meta Magri bdiet tgħajjarha kellha sieq ta’ mejda li nġabar minn x’imkien u li b’dan tkissret il-ħġieġa ta’ wara tal-karozza.
Il-Qorti qalet li x-xhieda ta’ Gauci kienet aktar kredibbli minn dik ta’ Magri, u li dan kien ikkorborat minn filmati tas-CCTV, li juri li Magri ġriet lejn il-karozza ta’ Gauci, fil-mument li lemħitha. Il-Qorti nnutat ukoll li l-ġerħa bl-arma kkawżat debulizza permanenti f’idejn il-vittma, fejn ħallilha subgħajha mgħawweġ.
Il-Qorti meta ġiet biex tagħti s-sentenza kkunsidrat ukoll il-kondotta nadifa ta’ Ramona Magri, u għalhekk sentenza ta’ ħabs ma kinitx waħda idonea, anke jekk ingħatat fil-massimu tagħha.
Minbarra s-sentenza sospiża l-Qorti ordnat ordni ta’ protezzjoni għall-perjodu ta’ sentejn fil-konfront ta’ Gauci. Il-ħatja kienet ordnata tħallas ukoll is-somma ta’ €2,209 konsistenti fi spejjeż tal-Qorti. Il-Prosekuzzjoni tmexxiet mill-Ispettur Roderick filwaqt li l-Avukati Franco Debono u Marion Camilleri deheru għal Magri.
//= $special ?>