Fi żmien meta l-awtonomija tal-awtoritajiet regolatorji hi għolja fuq l-aġenda politika, il-Gvern jidher li qed iħawwad ir-rwol tal-aktar istituzzjoni regolatorja importanti fil-pajjiż, dik tal-Parlament.
Il-ħatra ta’ Kabinett ġdid rat lill-Prim Ministru jaħtar 17-il Ministru u tmien Segretarji Parlamentari, u dan sar l-akbar Kabinett li qatt kien hawn f’ Malta.
Il-Kabinett, jew aħjar, il-bank ta’ quddiem tal-Gvern, hu tliet darbiet akbar mill-backbench. 10 Membri Parlamentari Laburisti biss m’għandhom l-ebda rwol dirett fil-Gvern, fosthom l-eks Mexxej Joseph Muscat, l-eks Ministru Konrad Mizzi, l-eks Ministru Chris Cardona u l-eks Ministru Justyne Caruana li kollha kienu f’kontroversja kbira li ġelithom ikunu fil-pożizzjoni li qegħdin.
Fl-Editorjal ta’ The Times of Malta tal-Erbgħa, intqal kif wieħed mill-irwoli ewlenin tal-Parlament hu li jissorvelja lill-Gvern u jżommu taħt kontroll. Iżda Kabinett daqshekk kbir fir-rigward tad-daqs tal-Parlament u tal-Gruppi Parlamentari jkisser il-bilanċ fil-Kamra. Effettivament, il-Parlament jitlef l-indipendenza tiegħu u jsir biss timbru tal-gomma.
Il-partit fil-Gvern għandu r-responsabbiltà li jiżgura li l-Gvern isegwi l-Programm Elettorali u ma jirrikorrix għal affarijiet oħrajn. Dan hu wieħed mir-rwoli tal-Grupp Parlamentari tiegħu.
Iżda b’tant membri parlamentari Laburisti li għandhom xi rwol fil-gvern, kważi huwa ċert li ħadd mhu se jqum pubblikament fil-Parlament biex iżomm kont tal-gvern. Il-membri parlamentari ma tantx huma mistennija jirregolaw ruħhom. Rajna dan iseħħ għal ħafna drabi, kompla jgħid l-editorjal tat-Times.
Is-sitwazzjoni sejra għall-agħar meta l-ftit membri tal-partit li fadal qed jingħataw impjiegi fuq bordijiet tal-gvern.
Nhar it-Tnejn, id-Deputat Prim Ministru Chris Fearne deher li rrikonoxxa s-sitwazzjoni anomala. Hu qal lill-Kamra li kien hemm bżonn li jkun assigurat sorveljanza tal-Parlament biex ikun jista’ jaħdem b’mod effettiv. Irid ikun hemm checks and balances xierqa mill-amministrazzjoni tal-Gvern u l-Oppożizzjoni.
Il-Partit Laburista għamel is-sitwazzjoni saħansitra agħar għalih innifsu, fl-aħħar snin, meta abolixxa l-irwol ta’ segretarju ġenerali.
Dan kompla joħoloq nuqqas ta’ kontroll u kkawża ħsara fir-reputazzjoni ta’ Malta kif deher evidenti taħt it-tmexxija ta’ Joseph Muscat.
Bħala stat indipendenti, Malta jeħtieġ li jkollha prim ministru u ministri biex imexxu oqsma ewlenin tal-attività tal-gvern u mhux kważi Ministru u Segretarju Parlamentari għal kollox.
Li jkollok Kabinett li huwa sproporzjonat mad-daqs tal-Parlament ifisser li ma jistax ikun hemm kontrolli u bilanċi xierqa fil-Parlament.
Għall-finijiet tal-pajjiż, il-leġiżlatura “ġdida” ma tistax tirrepeti l-iżbalji tal-passat, temm jgħid l-Editorjal.
