SWIEQI UNITED……………… 1
ĦAMRUN SPARTANS………. 3
Swieqi: E. Gatt, M. Attard, K. Muscat (L. Grech 64’), K. Sultana (S. Bugeja 42’), A.D. Schembri Wismayer, F. Nunes Fernandes, I. Salis (E. Ayorinde Tejumola 70’), M. Farrugia, J. Azzopardi, R. Taliana, D. Borg
Ħamrun: M. Bartolo (J.C. Debattista 76’), K. Micallef, A. Scicluna, M. Cinquini, A. Capitelli, M. Gauci, V. Alhinho, N. Leone, C. Borg (K. Higgins 85’), D. Borg (N. Muscat 90’), A. Soares
Imwissija: K. Muscat 15’ (S), A. Capitelli 48’, N. Leone 49’ (Ħ)
Skorjaw: K. Micallef 16’, 62’, N. Leone 90’ (Ħ), R. Taliana 78’ (S)
Referees: Slobodan Petrovic
Assistenti Referees: Edward Spiteri, Duncan Spencer
Ħamrun Spartans għaddew mal-aħħar tmienja b’rebħa ta’ 3-1 kontra t-tim tal-Ewwel Diviżjoni Swieqi United. Il-Ħamruniżi kienu ġejjin minn kwalifikazzjoni kontra Tarxien Rainbows u kisbu rebħa meritata għalkemm Swieqi United offrew oppożizzjoni denja.
Ħamrun kellhom opportunità tajba li jiftħu l-iskor wara ħames minuti meta Ailton Soares irċieva mingħand Conor Borg u twaqqa’ fil-kaxxa minn Marc Attard. Iżda mill-11-il metru, il-gowlkiper Edward Gatt salva t-tentattiv tal-istess Soares.
Iżda t-tim ta’ Manuele Blasi fetaħ l-iskor fis-16-il minuta meta minn kross ta’ Matthew Gauci, għola tajjeb KARL MICALLEF li għeleb lil Gatt b’daqqa ta’ ras. Fit-33 minuta, Conor Borg prova b’xutt bid-dawra li ntemm ftit għoli. Sitt minuti qabel tmiem l-ewwel taqsima, xutt ta’ Roderick Taliana spiċċa fuq il-mimduda u fuq in-naħa l-oħra, xutt ta’ Micallef kien imdawwar f’korner minn Gatt.
Il-gowlkiper ta’ Swieqi spikka fil-ftuħ tat-tieni taqsima meta salva xutt ta’ Ailton Soares wara li kien ħabbar il-ballun ma’ Nicola Leone. It-tim ta’ Rodney Bugeja mar qrib li jnaqqas id-distakk fis-57 minuta b’kontrattakk li minnu Ibrahim Salis sab lil Felipe Fernandes iżda t-tentattiv tiegħu ħabat man-naħa ta’ barra tax-xibka.
Ħamrun irduppjaw il-vantaġġ fit-63 minuta meta minn korner qasir ta’ Conor Borg, il-kross ta’ Ailton Soares sab lil KARL MICALLEF li skorja b’daqqa ta’ ras. Sitt minuti wara, xutt ta’ Soares kien salvat b’diffikultà minn Gatt.
Swieqi daħlu fil-logħba fit-78 minuta meta Valdo Alhinho biegħed il-ballun parzjalment minn throw-in fit-tul ta’ Ebenezer, bil-ballun jispiċċa għand RODERICK TALIANA li skorja b’xutt minn tarf il-kaxxa. Iżda l-Ispartans għalqu l-logħba fid-90 minuta meta kawża li Swieqi pruvaw iġibu d-draw, bnew kontratakk li minnu Ailton Soares qassam lejn NICOLA LEONE li skorja mill-qrib.Ż
