Tard wara nofsinhar mara li kienet abbord il-bastiment Ocean Viking, flimkien mat-tliet uliedha kienet evakwata lejn Malta permezz ta’ ħelikopter wara li sofriet xi ħruq.
Dan hekk kif fl-aħħar tlett ijiem telqu mil-Libja madwar 800 immigrant.
Dalgħodu ddaħħal Malta grupp ieħor ta’ immigranti… it-tieni wieħed fi ftit sigħat, fejn f’temp ta’ tnax-il siegħa daħlu f’pajjiżna 142 immigrant.
Grupp ta’ 95 immigrant ddaħħal f’Xatt it-Tiben ftit qabel l-għaxra ta’ filgħodu f’ħidma ta’ salvataġġ mill-Forzi Armati ta’ Malta Wieħed minnhom ittieħed l-Isptar Mater Dei b’ambulanza minħabba l-qagħda kritika li kien jinsab fiha.
Il-Ħadd filgħaxija ddaħħal grupp ieħor ta’ 47 immigrant, kollha rġiel, f’Xatt it-Tiben għall-ħabta tas-sitta ta’ filgħaxija. Huma kienu salvati mill-Forzi Armati ta’ Malta l-Ħadd filgħodu.
Matul il-lejl li għadda l-bastiment Ocean Viking salva 184 immigrant fosthom nisa u tfal. 102 kienu salvati minn fuq dinghy 80 mil nawtiku ‘l bogħod milLibja filwaqt li 82 kienu salvati mill-ibħra territorjali Maltin.
Fi 72 siegħa l-bastiment wettaq ħames operazzjonijiet ta’ salvataġġ fejn ġew salvati 407 immigrant.
