David Casa appella lill-Kummissjoni Ewropea biex tinkludi l-Emirati Għarab Magħquda fil-lista tal-UE ta’ pajjiżi terzi b’regolamenti dgħajfa ta’ Kontra l-Ħasil tal-Flus. Din il-lista tiġi riveduta perjodikament u l-proposta l-ġdida tal-Kummissjoni għandha tiġi ppubblikata fil-jiem li ġejjin.
Il-Kwestur tal-Parlament Ewropew David Casa ddikjara:
“Il-Kummissjoni għandha tippubblika att delegat bil-lista s-sewda l-ġdida tal-liġi kontra l-ħasil tal-flus il-ġimgħa d-dieħla. L-Emirati Għarab Magħquda għandhom jkunu f’din il-lista u l-Parlament għandu d-dmir li jifli sewwa din l-lista”.
F’ittra lill-Viċi President Eżekuttiv tal-Kummissjoni Ewropea Dombrovskis David Casa ddikjara:
Il-ġurnalista investigattiva Daphne Caruana Galizia ġiet maqtula bil-għan li titwaqqaf milli tesponi korruzzjoni ta’ livell għoli u ħasil ta’ flus.
Din l-istess korruzzjoni u l-ħasil ta’ flus kienu possibbli permezz ta’ kumpanija rreġistrata f’Dubaj u bank ibbażat f’Dubaj.
Ġurisdizzjonijiet sigrieti għandhom rwol indispensabbli biex jippermettu l-kriminalità finanzjarja. Ħafna drabi dan iseħħ mingħajr l-għarfien tal-ġurisdizzjoni. Dan huwa inaċċettabbli. Madankollu, huwa saħansitra iktar inaċċettabbli meta l-awtoritajiet f’dawn il-ġurisdizzjonijiet jiġu konxji mill-gravità tad-delitti li jkunu ffaċilitaw u jirrifjutaw li jikkooperaw mal-investigazzjonijiet Ewropej.
L-awtoritajiet fl-Emirati Għarab Magħquda jafu sewwa dwar il-gravità ta’ dan il-każ. Huma konxji sew li l-ġurisdizzjoni tagħhom intużat biex tiffaċilita reati li fuqhom ġiet maqtula ġurnalista Ewropea. Huma konxji sew li billi rrifjutaw li jikkooperaw mal-investigazzjoni huma qed jagħtu impunità għall-korruzzjoni li tinsab fil-qalba tal-motiv biex tinqatel Daphne Caruana Galizia.
L-Emirati Għarab Magħquda jafu sew b’dawn il-fatti għaliex iltqajt personalment ma’ uffiċjali ta’ livell għoli. Jien bgħatt ukoll korrispondenza konsiderevoli lill-Avukat Ġenerali tal-UAE, lill-FIU, kif ukoll lill-bank rilevanti. Barra minn hekk, dan il-każ issa rċieva rapportaġġ wiesa fuq il-midja globali.
Jibqa’ dejjem il-fatt li l-Emirati Għarab Magħquda s’issa rrifjutaw li jikkooperaw mal-investigazzjonijiet li ġew żvelati waqt l-inkjesta pubblika dwar il-qtil ta’ Daphne Caruana Galizia.
Dan huwa intollerabbli.
L-Emirati Għarab Magħquda issa ġew imsemmija wkoll fil-Luanda Leaks bħala l-ġurisdizzjoni li kienet l-pjattaforma għall-iskema tal-ħasil tal-flus esposta minn ġurnalisti investigattivi.
Fid-dawl ta’ dawn iċ-ċirkustanzi, bħala l-Kelliem tal-PPE dwar il-miżuri kontra Ħasil tal-Flus fil-Kumitat tal-Affarijiet Ekonomiċi u Monetarji, fil-fehma tiegħi l-Emirati Għarab Magħquda għandhom jiġu inklużi fil-lista sewda tal-Unjoni Ewropea.
//= $special ?>