Hibernians telgħu waħedhom fl-ewwel post meta fil-konfront dirett għelbu lil Starlites GIG 63-61. Il-logħba qatt ma laħqet livelli għolja u anki l-uffiċjali ma kellhomx kontroll feliċi speċjalment ir-referee Simic. F’mumenti deċiżivi, saru ħafna żbalji kemm mill-uffiċjali kif ukoll miż-żewġ timijiet, b’Starlites probabbli kienu l-aktar li bataw.
Wara bidu kwiet, Hibernians ħadu vantaġġ bikri. Starlites irnexxielhom jirkupraw żvantaġġ ta’ 9-4 u temmew l-ewwel perjodu 15-13. Starlites komplew ikunu l-aħjar tim fil-bidu tat-tieni perjodu mgħejjuna minn deċiżjonijiet stramba mir-referee u marru 28-15.
Hibernians irkupraw u bi tliet konklużjonijiet mill-bogħod ressquhom basket bogħod. Starlites daħlu jistrieħu 37-26 minn fuq iżda Hibernians bdew aħjar wara l-mistrieħ u għamlu l-iskor 40-40. Biż-żewġ timijiet jiżbaljaw, kienu Starlites li bdew l-aħħar perjodu 47-45 fil-vantaġġ, iżda Hibernians sfurzaw il-ħin barrani u spiċċaw rebbieħa b’konklużjonijiet mill-bogħod.
Fil-logħba l-oħra, ARMS Depiro rebħu 87-78 kontra Luxol. Depiro kienu aħjar wara l-mistrieħ, bl-Amerikana Johnson reġgħet kienet protagonista fejn kisbet 35 punt. Luxol kellhom bidu tajjeb u marru 15-4 u temmew l-ewwel perjodu għaxar punti minn fuq. Depiro bdew aħjar it-tieni għaxar minuti u rnexxielhom idawru l-vantaġġ għal 32-28. Luxol wettqu reazzjoni u daħlu jistrieħu 42-42.
Huma kisbu ħames punti konsekuttivi fl-ewwel minuti tat-tielet perjodu, madankollu Depiro rreaġġixxew u bdew l-aħħar għaxar minuti 60-58 fil-vantaġġ. Depiro komplew jitbiegħdu mal-bidu tal-aħħar perjodu biex ikkontrollaw id-distakk li bnew fl-ewwel minuti tas-sessjoni.
