Il-fatt li l-iskart f’Malta, anke dak li l-familji Maltin jisseparaw fi djarhom, qed jiġi mħallat kollu fil-Magħtab, mhux biss qed jaffetwa l-ambjent imma anke lin-negozji.
Kien għalhekk illi wara li ħadna l-kummenti tal-Ministru tal-Ambjent, Net News tkellem ma’ Abigail Mamo il-Kap Eżekuttiv tal-Kamra tal-Intrapriżi Żgħar u Medji.
In-negozji li jħallsu għall-ġbir, trattament u riċiklaġġ tal-materjal riċiklabbli bħall-karta, kartun, plastic u metall qed jonfqu eluf kbar ta’ ewro biex jiġbru dan l-iskart.
Pero… kif żvela Net News u kif ikkonferma l-Ministru Aaron Farrugia, dan kollu qed isir għalxejn għaliex kollox qed jispiċċa jintrema f’post wieħed fil-Magħtab – xi ħaġa li ilha ssir tliet snin, u se tibqa’ ssir tal-inqas sal-aħħar ta’ din is-sena.
Dan qed jaffettwa mhux biss il-familji u n-negozji imma anke l-miri ambjentali li l-pajjiż ghandu quddiemu.
Staqsejna lil Abigail Mamo jekk saritx konsultazzjoni min-naħa tal-Ministeru tal-Ambjent mal-Kamra tal-Intrapriżi Żgħar u Medji.
Fl-aħħar jiem, il-filmati li żvela Net News qajmu rabja kbira fost il-familji li ta’ kuljum jisseparaw l-iskart.
