Il-Kap tal-Oppożizzjoni Adrian Delia ltaqa’ mal-Ambaxxatur tal-Iżrael għal Malta Eyal Sela waqt laqgħa li saret fl-Uffiċċju tal-Kap tal-Oppożizzjoni fil-Parlament. Matul din il-laqgħa ġew diskussi bosta temi fosthom il-ħbiberija li teżisti bejn Malta u Iżrael u l-kummerċ li jsir bejn iż-żewġ pajjiżi.
Dr Delia tkellem ukoll dwar is-sitwazzjoni politika f’Malta u kif l-Oppożizzjoni tinsab iffukata sabiex f’pajjiżna jkun hawn demokrazija li verament tiffunzjona kif ukoll ġustizzja u l-ħarsien tas-saltna tad-dritt. Min-naħa tiegħu l-Ambaxxatur Eyal Sela tkellem dwar l-elezzjonijiet fl-Iżrael, is-sitwazzjoni fir-reġjun tal-Lvant Nofsani u d-diversi laqgħat li qed ikollu mal-partijiet differenti tas-soċjetà f’Malta.
Temi oħra li ġew diskussi kienu r-relazzjoni ta’ Iżrael mal-komunità internazzjonali hekk kif dan il-pajjiż għalkemm wieħed żgħir għandu rwol ċentrali fix-xenarju internazzjonali.
Matul din il-laqgħa l-Kap tal-Oppożizzjoni Adrian Delia kien akkumpanjat mill-Kelliem tal-Oppożizzjoni għall-Affarijiet Barranin u l-Promozzjoni tal-Kummerċ Carmelo Mifsud Bonnici u l-President tal-Forum Professjonisti tal-Partit Nazzjonalista (FPPN) Graham Bencini.
