Kontra l-prassi li dejjem sar fil-Parlament il-Prim Ministru Robert Abela llum naqas li jaġġorna lil Kamra tar-Rappreżentanti bl-aħħar żviluppi li jikkonċernaw l-andament tas-Summit Ewropew li sar fl-aħħar jiem, li kien jirrigwardja l-pakkett finanzjarju ta’ pajjiżna għas-snin 2021-2027. Dan meta huwa suġġett li jinteressa direttament lill-poplu Malti u Għawdxi kollu.
Wieħed ma jistax jifhem għalfejn il-Prim Ministru naqas illi jaġġorna l-Kamra dwar dan l-andament sa issa tan-negozjati, li huma daqstant importanti. Infakkru li l-aħħar pakkett finanzjarju li kien innegozja Gvern Nazzjonalista immexxi minn Lawrence Gonzi kien jammonta għal €1,200 miljun. Skont il-proposta tal-Kummissjoni Ewropea, Malta hija fost ftit pajjiżi l-iktar li se jonqsulhom il-fondi Ewropej.
Fi stqarrija, il- Kelliem tal-Oppożizzjoni dwar Kunsilli Lokali, l-Komunitajiet u l-Fondi Ewropej Robert Cutajar u il-Kelliem tal-Oppożizzjoni għall-Affarijiet Barranin u l-Promozzjoni tal-Kummerċ Carmelo Mifsud Bonnici saħqu kif il-Prim Ministru huwa fid-dmir jikkonferma jekk din hix ukoll il-pożizzjoni tal-President tal-Kunsill tal-Ewropa li qed imexxi dawn in-negozjati. Għalhekk l-Oppożizzjoni tittamma u tistenna li l-Gvern Laburista jagħmel dak kollu li huwa possibbli sabiex possibbilment l-istess għajnuna li konna ħadna fil-pakkett finanzjarju preċedenti jerġa’ jkun disponibbli għal pajjiżna.
